DILI, (TATOLI) – Bolseiru Timor-oan hamutuk 60 ne’ebé hetan bolsa hosi governu liuhosi Ministériu Edukasaun iha 2012 sente ameasadu tanba sira submete ona rekerementu hodi husu hanaruk kontratu bolsa nian, maibé to’o ohin loron seidauk iha resposta hosi ministériu relevante.
“Se karta prolongamentu ne’e la-ACC (ACCEPT/ACCEPTED/ACCEPTANCE-simu no aseita) iha tempu badak ne’e mak bolseiro barak sei falla hotu kedas ba bolsa e bele ameasa atu fila ba Timor sem diploma”, informa reprejentante bolseiru, Hermen Guterres ba TATOLI via email ne’ebé asesu iha kinta, (4/5).
Bolseiru sira ne’e iha maiu 2012, entaun kontratu bolsa vale hosi maiu 2012 to’o maiu 2015.
Kláusula balun hosi kontratu bolsa nian hatete governu fó fleksibilidade ba bolseiru sira hodi husu prolongamentu ba kontratu bainhira to’o data ne’ebé determina kontratu bolseiru, seidauk akaba nia estudu.
Bazeia ba ida ne’e mak bolseiru sira iha fulan kotuk (marsu) submete ona karta rekerementu ba ministériu kompetente hodi husu akreditasaun ba prolongamentu bolsa tanba sira nia estudu sei akaba iha tinan ida tan no balun fulan neen tan. Maibé to’o ohin loron seidauk iha akreditasaun ruma hosi ministériu kompente.
Sorin seluk bolseiru sira iha fulan ida ne’e la-simu osan bolsa no tanba buka matenek, sira tenke sobrevive ho osan rasik hodi hein akreditasaun hosi governu.
“Se akreditasaun mak dada tan, ami bolseiru nain 60 resin ne’e labele konsegue sobrevive (moris) ho osan rasik”, lamenta.
Hodi dehan tenik, aluno balun hela semestre ida ka fulan tolu atu remata estudu, se falla iha fulan sira ikus ne’e maka falla totál.
Jornalista: Manuel Pinto
Editora: Rita Almeida
