DILI (TATOLI) – Deputada Florentina Smith husi bankada FRETILIN husu esplikasaun ba Ministra Solidaridade Sosiál (MSS) ne’ebé liga ho rejime kontributivu seguransa sosiál, ne’ebé koa pursente haat husi baze saláriu nian.
“Husu ministra atu esplika iha parlamentu ou bele hatama dokumentu ruma nune’e ami bele hatan ba funsionáriu sira”, katak iha plenária, segunda (8/5).
Nia dehan tan husi parte Ministériu Finansa (MF) hateten subsidiu ne’e komesa koa iha fulan abril, ami mos halo audiénsia no fizkalizasaun, katak ida ne’e MF mak foti desizaun, no husi parte MSS nian la-hatene.
“Agora oinsá mak bele ministériu sira la koordena malu no osan ida koa ona ne’e balun husu para fó fila fali tanba lakohi”, kestiona.
Antes ne’e, rejime kona-ba inskrisaun no obrigasaun kontributiva ne’ebé aprezenta husi MSS hetan ona aprovasaun iha Konsellu Ministru iha 7 marsu 2017, inklui mós rekomendasaun husi membru governu sira.
Diploma ida ne’e, define prinsípiu no regra inskrisaun nian sira ba traballadór no entidade empregadora sira rejime jerál nian, determina responsabilidade ba obrigasaun kontributiva, estabelese baze insidénsia kontributiva, fiksa taxa kontributiva, define ona regra sira kona-ba pagamentu no aprezentasaun dokumentu seguransa sosiál no kritériu sira atu halo rejistu kona-ba remunerasaun no tempu servisu nian.
Diploma ne’e mós regula kona-ba garante seguransa sosiál nian, kumpri obrigasaun kontributiva, husi dívida sira ba seguransa sosiál no rejime kontraordenasaun espesífika sira iha ámbitu rejime kontributivu ba seguransa sosiál, ne’ebé aprova ona iha fulan-outubru tinan 2016 husi Parlamentu Nasionál.
Jornalista: Julia Chatarina
Editora: Rita Almeida
