DILI, (TATOLI) – Governu liuhusi enkontru Konsellu-Ministru aprova ona rezolusaun Governu kona-ba roteiru ba implementasaun Objetivu Dezenvolvimentu Millenium (ODM), ajenda 2013 iha Timor-Leste.
Sekretáriu Estadu Konsellu-Ministru, Avelino Maria Coelho da Silva ba jornalista sira iha Palásiu Governu, ohin, informa ajenda ne’e aprezenta husi Gabinete Primieru-Ministru.
Aleinde ne’e, aprova mós proposta lei, seguransa, saúde, no ijiene iha serbisu ne’ebé aprezenta husi Ministru Koordenadór Asuntu Ekonómiku (MEKAE) no Sekretáriu Estadu ba Polítika Formasaun Profisonál no Empregu (SEPFOPE).
“Depois Ministru Koordenadór Asuntu Ekonómiku aprezenta segundu alterasaun ba Dekretu Governu númeru 2/2015, 6 Jullu nian ko’alia kona-ba tarefa lisensa peska nian, inspesaun servisu ba relativu ba atividade peska, aprovadu”, Avelino katak.
Ministériu Finansa aprezenta primeira alterasaun Dekretu Governu númeru 1/2017, 9 Janeiru kona-ba ezekusaun Orsamentu Jerál Estadu ba 2017 ne’ebé hetan mós aprovasaun.
“Ministériu Solidariedade Sosiál aprezenta Dekretu Lei rejime inskrisaun no obrigasaun iha ámbitu rejime kontributiva seguransa sosiál nian, uluk mai diskute tiha ona, haruka ba Prezidente mas iha proposta balun, ne’ebé ohin lori mai fali Konsellu-Ministru no aprovadu ona, agora hein de’it atu haruka fali ba Prezidente Repúblika atu halo nia promulgasaun”.
Ministériu Turizmu Arte no Kultura (MTAK) aprezenta rezolusaun Governu kona-ba dezlokeamentu verba millaun U$1.500 atu halo konstrusaun inisiál ba Biblioteka Nasionál Ministériu Turizmu nian ne’ebé Konsellu-Ministru delibera no halo ona aprovasaun.
Ministru Defeza aprezenta rezolusaun kona-ba efetivu atu inkorpora tau F-FDTL hahú 2018. “Hanoin katak ba oin to’o 2020 ita bele to’o 3.600, agora daudaun ita iha 3000 efetivu, ne’ebé ohin Konsellu-Ministru autoriza aprova para hahú 2018 ita halo tan inkorporasaun prasa balun ba tan F-FDTL”.
Jornalista: Maria Auxiliadora
Editora: Rita Almeida
