DILI (TATOLI)– Ministru Estadu Koordenadór Asuntu Sosiál, António da Conceição hato’o sincero gratidão ‘Obrigado’ ba brigada Médika Kubana tanba ajuda ona Ministériu Saúde iha Programa Saúde na Família.
“Iha okaziaun hato’o mós sincero gratidão ba Brigada Médika Kubana ne’ebé ajuda Ministériu Saúde iha dezenvolve Programa Saúde na Família no Klínika Prontu Atu Serví (PAS), ba fasilita no implementa modelu despensarizasaun iha área Remak, Bekora,” António da Conceição hato’o iha lansamentu livru no vídeo Saúde na Família iha Centro Convensaun Dili, (CCD), Tersa (23/05).
Conceição hatete, Governu Timor-Leste hakat tan pasu ida hodi refirma nia kompromisu atu hadi’a ba asesu no kualidade servisu saúde ba povu timorense hodi introdús Programa Saúde na Família.
Nune’e nia espera, lansamentu livru no vídeo Programa Saúde na Família la’ós de’it hanesan kolesaun esperiénsia reál ne’ebé inspirativu liuhusi viajen ba implementasaun Saúde na Família, maibé atu fó hanoin ba benefísiu potensiál Saúde na Família atu redús taxa mortalidade ba labarik no inan isin rua, kobre imunizasaun, hadi’ak má nutrisaun, redús moras ne’ebé da’et nomós prevene risku ba sosiál no ekonómiku ho moras ne’ebé lada’et, iha orden atu mellora estatutu ba populasaun Timór.
Agradese mós ba ba diretór munisípiu 12, Rejiaun Espesiál Oekusi-Ambeno, Nasionál, Rejionál no Koordenadór muinisípiu saúde na família. “Ha’u-nia nia gratidaun kle’an ba imi.”
Apresiasaun mós ba Organizasaun Saúde Mundiál WHO no UNICEF ba suporta ne’ebé fó ba Ministériu Saúde no ajuda halo Programa Saúde na Família iha realidade.
(Jornalista : Maria Auxiliadora).
(Editór : Manuel Pinto)
