DILI, (TATOLI) – Espoza Prezidente Repúblika, Cidalia Lopes Guterres konsidera timoroan sira ne’ebé hetan oportunidade hodi tuir programa JENESYS 2016 ne’e importante tebes.
Alende haforsa relasaun entre Timor-Leste no povu Japaun, biban di’ak ba foinsa’e sira atu aprende liutan oinsá povu Japaun dezenvolve sira-nia rain no sira-nia sosiedade.
“Ba ida ne’e, ha’u-nia agradesimentu wa’in ba povu no governu Japaun tanba fó ona di’ak ida ne’e mai ami-nia foinsa’e sira”, hatutan espoza, Francisco Guterres Lú-Olo iha embaixada Japaun, Avenida Portugal Praia dos Coqueiros Dili, tersa (30/05) bainhira partisipa iha Jenesys 2016 Reporting Session.
Timoroan sira ne’ebé partisipa ona iha programa ida ne’e hein katak bele lori mai Timor-Leste lisaun di’ak sira ne’ebé hetan ona durante vizita Japaun.
“Fahe esperiénsia ida ne’e ho imi-nia maluk sira ne’ebé la hetan oportunidade di’ak ida ne’e”, hateten
Hodi husu mós katak sira ne’ebé sei tuir iha programa Jenesys tuir mai, aproveita ho di’ak, la’ós de’it ba benefísiu pesoál maibé mós ba sosiedade.
“Ha’u hein katak ita-boot sira-nia atividade loron tolu mai ne’e nia laran, sei la’o ho di’ak entre povu Timor-Leste ho Japaun”, reforsa tan.
Entretantu atividade Jenesys 2016 Reporting Session hala’o hahú ohin no sei termina iha kinta, (1/6).
Jornalista: Rafy Belo
Editora: Rita Almeida
