DILI (TATOLI)-Ajénsia Estadus Unidus ba Dezenvolvimentu Internasionál (USAID) enserra ona nia projetu no entrega sertifikadu fundu ki’ik ba organizasaun baze komunitária (OBK) hamutuk 46 iha Autoridade Munisipál Baukau hodi implementa atividade hamutuk ho konsellu suku ne’ebé fo benefísiu ba komunidade. Apoiu ne’ebé USAID fó dezde 2015 to’o inísiu 2017 hamutuk U$30,126.50.
Fundu ne’e atu masimiza membru komunidade sira-nia partisipasaun iha dezenvolvimentu suku nian no governasaun lokál, liuhusi inisiativa ne’ebé fasilita husi OBK sira hanesan enkontru konsultasaun kona-ba prioridade planu suku, dezenvolve planu suku, hadi’a administrasaun suku nian liuhusi kria arkivu, no seluk tan, hodi hafasil kolaborasaun entre komunidade no lideransa lokál.
Projetu Mai Munisípiu, hahú iha tinan 2015, apoiu ona OBK sira hamutuk 46 atu alkansa partisipasaun komunidade iha governasaun lokál, no kada OBK simu fundu ki’ik hamutuk U$500 to’o U$750 hodi servisu besik no metin liután ho sira-nia konsellu suku sira iha Baukau iha grupu hamutuk 11, Kovalima hamutuk 7, Ermera hamutuk 16, Likisá grupu 5, no Rejiaun Oekusi iha grupu 7.
Liuhusi fundus ne’e, projetu Mai Munisípiu servisu besik ho OBK sira hodi fornese oportunidade ba membru komunidade lokál sira liuliu feto, joven, no ema ho defisiénsia sira hodi implementa atividade hamutuk ho Konsellu Suku ne’ebé fó benefísiu ba komunidade nomós bele hasa’e komunidade sira-nia konfiansa ba konsellu suku sira liuhusi servisu sira iha área planeamentu, jestaun administrasaun, dezenvolvimentu infraestrutura, no manutensaun.
USAID nia Diretór Misaun, Diana Putman foin lalais ne’e hatete, ne’e hanesan servisu ida husi xefe-suku sira, membru konsellu no sidadaun hotu-hotu atu promove ho laran no ho partisipasaun ne’ebé inkluzivu, fasilita ema sira-nia asesu ba sistema justisa ne’ebé justu, partikularmente ba feto no labarik.
Xefe ekipa Counterpart International projetu Mai Munisípiu, Carolyn Tanner dehan espíritu kolaborasaun entre governu, konsellu suku, organizasaun sosiedade sivíl no organizasaun baze komunitária ne’e importante tebes hodi bele fó benefísiu di’ak liután ba sira-nia komunidade.
Durante tinan 2014 to’o tinan 2017 projetu Mai Munisípiu servisu hamutuk ho MAE no membru konsellu suku 20 iha Baukau liuhusi nia atividade formasaun no asisténsia tékniku ba konsellu suku 20, interkámbiu entre suku sira, fórum suku-munisípiu, expo suku, no fornesimentu fundus ki’ik ba organizasaun komunidade nian ne’ebé servisu hamutuk ho konsellu suku hodi hasa’e partisipasaun komunidade iha prosesu foti desizaun.
Prezidente Autoridade Baukau,António Guterres hatete, maski programa Mai Munisípiu remata ona, odomatan atu halo kolaborasaun ho Autoridade Baukau sempre nakloke.
Projetu Mai Munisípiu mós servisu hodi hametin liután asesu ba justisa ba ema kbiit-la’ek sira liuhusi formasaun ba konsellu suku kona-ba sistema justisa, fornesimentu asisténsia legál, no edukasaun legál iha baze husi organizasaun asisténsia legál, kolaborasaun ho Tribunál Distritál iha Baukau, no programa edukasaun iha Rádiu Komunidade Lian Matebian Baukau.
Durante Fevereiru 2015 too Maiu 2017, ema na’in 361 inklui feto 70 hetan asisténsia legál gratuita husi parseiru Comissão Justiça e Pás Baukau (JPC) liuhusi klínika legál ne’ebé movel. Atividade hirak ne’e mós kontribui ba Governu Timor-Leste nia Planu Estratéjiku 2011-2030. (Jornalista : Maria Auxiliadora, Editór : Manuel Pinto)
