METINARO (TATOLI)—Komisáriu Adultu Uniaun Nasionál Eskuteiru Timor-Leste (UNE-TL) organiza kapasitasaun ba dirijente sira UNE-TL nian hosi munisípiu atu sira bele sai jestór no lideransa ida di´ak.
Formasaun ne´e hala´o iha Centro Wenunuk Metinaro, Munisípiu Dili, horsehik. Membru UNE-TL ne´ebé partisipa iha kapasitasaun ne´e mai hosi Munisípiu Lautem, Baucau, Viqueque, Aileu, Ainaro, Ermera no Bononaro.
Iha nia intervensaun, Prezidenti UNE-TL, Idelta Rodrigues hateten UNE-TL marka tan istória foun iha era ukun án liuhusi Movimentu Eskuteiru ho naran UNE-TL iha nível nasionál, rejionál no internasionál.
“Liuhusi prosesu naruk hahú hosi 2005 to’o mai 22 Juñu 2017, ho ita nia serbisu maka´as tebes tantu hosi nasionál ba munisípiu ita konsege hamorin naran UNE-TL iha palku mundiál,” Idelta haktuir.
Nia dehan tenki serbisu maka´as nafatin hodi bele atu bele hasa´e kuñesementu no kapasidade hodi bele dezenvolve agrupamentus liuhusi lideransa di´ak, sai jestór di´ak, iha akontabilidade no produsaun relatóriu iha ita ida-idak nia munisípiu hodi bele kompete ho nasaun seluk iha mundu.
“Ita hakarak haruka dirijente barak ba tuir formasaun maibé ita iha difikuldade orsamentu. Maibé, ha´u fiar katak ho adezaun UNE-TL ba membru 165 maka ita sei halo planu di´ak liu iha ita nia programa iha VII Konstitusionál atu bele kapasita ita hotu bele jere ita nia serbisu di´ak liu iha futuru,” Idelta haklaken.
Nia husu ba dijente sira ne´ebé tuir ona formasaun báziku no advance atu bele kontatu malu ho komisáriu sira UNE-TL atu bele halo kna´ar nune’e ida-idak nia serbisu bele la´o ho másimu iha teritóriu laran tomak.
Eis membru governu ne´e mós husu ba agrupamentu sira tenki moris semanalmente hodi bele prepara labarik sira hodi hasa´e talentu ho kretividade no inovador. Labele hein iha atividade ou akampamentu maka foin book án.
(Jornalista: Xisto Freitas,Editór : Manuel Pinto)
