TIBAR, (TATOLI)- Governu liuhusi Autoridade Nasionál Petróleu no Minarai (ANPM) no Sekretáriu Estadu Polítika ba Formasaun Profisionál no Empregu (SEPFOPE) hamutuk ho esforsu kolletivu entre ConocoPhilips hanesan operadór Bayu Undan nia no fornesedór treinamentu, kompañia Cegelec husi Fransa lansa ona treinamentu indústria ho klase mundiál.
Lansamentu ba treinamentu vokasionál ho kategoria formasaun ba eletrisidade no instrumentasaun klase mundiál ne’e ba dahuluk hala’o iha Sentru Nasionál Empregu no Formasaun Profisionál Tibar hafoin diskusaun naruk iha tinan lubuk nia laran atubele estabelese no formula programa ida ne’ebé ohin halo ona lansamentu ho pakote hamutuk tinan rua.
Formandu sira ne’ebé selesionadu atu tuir formasaun ida ne’e hamutuk ema na’in-30 ne’ebé inklui mós feto rua ne’ebé hahú tiha ona treinamentu iha semana kotuk.
Prezidente Autoridade Nasionál Petróleu no Minerál (ANPM), Gualdino da Silva hatete formasaun ida ne’e hanesan projetu pilotu ida no halai liu ba indústria estrativa ne’ebé refere ba petróleu, esplorasaun no esploitasaun ba petróleu nomós ba mineira.
Liuhusi formasaun ne’e prepara taraballadór sira atubele kompete ho ema liur maibé ho padraun formasaun nian ne’ebé iha maka traballadór sira aproveita halo di’ak, sira sei bele kompete ho ema liur tanba indústria ne’e kompetitivu liu no kurríkulu formasaun nian ne’ebé iha bele prodús ema sira ne’ebé prontu atu servisu iha indústria.
“Maibé lataka dalan ba indústria seluk hanesan indústria serveza Heineken nomós indústria halo konstrusaun sira hanesan Portu Tibar nian, portu seluk iha futuru depois projetu hotu ne’ebé iha mak presiza ema ho kualifikasaun indústria nian, liuliu ba iha parte eletrisidade nomós instrumentasaun nian, husi tinan ida mai ne’e bele fornese ona graduadu indústria ho kualidade globál”, Gualdino informa iha Tibar, ohin.
ANPM ne’ebé servisu hamutuk ho kompañia sira liuhusi projetu konteúdu lokál bele loke programa sira ne’e atubele ajuda liuliu Governu nia esforsu hodi bele prepara graduadu sira atu prontu kompete iha indústria.
Country Manager ChonocoPhillips, José Lobato hatete ConocoPhilips ne’ebé reprezenta projetu Bayu Undan ba kompañia hotu iha Bayu Undan nian ne’ebe fó finansiamentu ba treinamentu vokasionál ho montante millaun U$2 ba tinan rua.
Nia hatutan treinamentu ba eletrisidade tuir padraun internasionál ne’e kompañia husi Fransa mak sei fó treinamentu no kompañia ida ne’e iha ona esperiénsia halo formasaun ba setór petróleu iha rai sira seluk.
“Ha’u kontente liu tanba skill sira ne’ebé orsida sai husi treinamentu la’ós uza de’it ba setór petróleu maibé bele ba setór hotu-hotu. Sira sei bele serbisu ba kompañia fábrika ruma ne’ebé atu loke ita Timór, ida ne’e mós bele uza, ba ha’u importante tanba labele haree de’it ba setór petróleu nian maibé setór hotu nian”.
José Lobato hato’o ba formandu sira katak kompañia loke dalan no ajuda ona maibé susesu iha sira-nia liman maibé responsabilidade iha sira-nia kabás tanba baihira lasusesu maka ba futuru atu halo programa hanesan ne’e susar uitoan.
Jornalista: Maria Auxiliadora
Editora: Rita Almeida
