DILI, (TATOLI) – Primeiru Ministru, Rui Maria de Araújo hatete Timor-Leste sei selebra loron konsulta populár 30 agostu 2017 ba dala XVIII maibé momentu istóriku ne’e komemora iha tranzisaun polítika nia laran.
“Hela de’it loron rua atu Timor-Leste selebra 30 agostu iha tranzisaun polítika nia laran, hein katak sidadaun hotu sei nafatin tur hakmatek, hein prosesu polítiku ne’e la’o hodi nune’e hanesan povu lori prosesu konstrusaun nasaun no Estadu ba oin tuir mehi ne’ebé Timoroan hotu mehi durante tinan 24 iha funu libertasaun nian”, apela bainhira vizita ba konstrusaun edifísiu Komisaun Funsaun Públika (KFP) iha Matadouru, ohin.
Nia akresenta, nu’udar Xefe Governu apela ba povu tomak atu tur hakmatek, povu nafatin iha esperansa no kontribui parlamentu foun no governu foun ne’ebé sei mai atu dudu prosesu dezenvolvimentu sósiu ekonómiku Timor-Leste nian ba oin.
Nia haktuir, luta libertasaun nasionál povu tomak hatudu ba mundu no hatudu ba malu katak Timoroan hotu-hotu hakarak deside auto determinasaun ba independénsia iha 30 agostu 1999.
To’o ikus, mehi ne’ebé povu mehi bele konkretiza sai realidade liuhosi votasaun ne’ebé Timoroan halo iha 30 agostu hodi determina futuru nasaun ne’ebé independentemente ho Nasaun Repúblika Demokrátika Timor-Leste (RDTL).
Enkuantu, momentu ne’eba, reprezentante Organizasaun Nasoen Unida (ONU) Knut Ostby hatete, loron konsulta populár 30 agostu 1999 refleta realizasaun brani husi povu Timor hodi ezerse sira nia direitu ba ukun rasik -án.
Iha loron konsulta populár ida ne’e mundu hamrik hamutuk ho Timor-Leste hodi sai sasin ba dedikasaun no dezanimasaun husi povu hodi hetan pás.
Jornalista: Zezito Silva
Editora: Rita Almeida
