DILI, (TATOLI) – Eskola Sekundáriu Tékníku Vokásional-Grupu Teknolojia Indústria Bekora ohin hahú simu estudante foun ba tinan letivu 2017 to’o 2018.
Diretór ESTP-GTI Bekora, Francisco Guterres, hateten prosesu rejistrasaun ne’e bazeia ba kalendáriu Ministériu Edukasaun hahú loron 18 to’o 23.
“Ohin hahú rejistrasaun to’o 21 no loron 22 sei halo teste eskrita no orál, depois 23 sei anúnsiu rezultadu testeʺ, katak nia iha Bekora, ohin.
Hatutan tan matéria lian-inglés, portugés, siénsia naturál no matemátika sei sai teste eskrita no orál ba estudante foun.
“Ami simu estudante foun hamutuk 210, sei fahe ba departementu neen no kada sei koloka estudante mínimu 35 no másimu 40 maibé husi 40 ne’e nain lima suplente bainhira estudante balun rezigna-ánʺ, esplika tan.
Valór tenke atinje pursentu 100 husi prova eskrita no orál. “Valór hosi materia haat ne’e tenke pursentu 80 no teste orál valór pursentu 20, totál tenke pursentu 100ʺ, afirma.
Tinan ne’e ESTP-GTI loke mós oportunidade ba estudante hosi munisípiu 12 inklui Dili hodi rejista.
Eskóla ne’e iha departementu neen, kompostu hosi departementu IT (Information Technology), eletrisidade, mekánika produsaun, mekánika autó-movel, elektrónika no konstrusaun sivíl.
Loron 5 fulan-janeiru 2018, ESTP-GTI sei rejista fali estudante foun iha loron 8 to’o 13 no hala’o orientasaun programa estudu koñesementu no ambiente.
Diretór ne’e mós haktuir estudante finalista ESTP-GTI ne’ebé pasa iha ezame nasionál no prova aptidaun profesionál ho valór aas 36 no mínimu 25 hosi estudante 176 maka pasa no nain ida maka la pasa tanba la tuir ezame nasionál.
Jornalista: Agapito dos Santos
Editora: Rita Almeida
