DILI, (TATOLI) – Sekretáriu Estadu Konsellu Ministru no Komunikasaun Sosiál, Matias Boavida, hateten Governu liuhosi ministériu hotu tenke servisu tuir rerga protokulár oinsá mak atu komunika ho utente sira ho di’ak atu bele garante servidór Estadu no povu.
“Formasaun importante tebes tanba oinsá ema iha ministériu laran bele moris tuir regra protokolár nian, nune’e bele sai komunikatór no komunikan ho utente sira hodi sai servidór di’ak ba Estadu no povu”, portavós Governu, Matias Boavida, esplika hafoin serimónia gradusaun ba formandu sira iha Sentru Formasaun Téknika iha Komunikasaun (Ceftec-sigla portugés) iha Palásiu Governu, segunda (12/3).
Formasaun ne’e útil ba ministériu sira no hanoin katak ba oin bele hadi’a servisu di’ak liután liuhosi koñesimentu hirak ne’e. Treinamentu foku liu kona-ba área komunikasaun, relasaun públika no protokolu, formandu hirak ne’e hamutuk ema nain 21mak hetan graduasaun hosi sira ne’e feto nain 16 no mane hamutuk 11mai hosi instituisaun la hanesan.
Parte seluk, Koordenadora Ceftec, Rosalia Belo, akresenta formasaun ne’e halo atu aumenta koñesimentu ba tékniku profesionál sira iha área komunikasaun, protokolu no relasaun públika, nune’e sira bele fó atendimentu públiku ho di’ak iha ida-idak nia instituisaun sira.
Ceftec tutela iha Prezidénsia Konsellu Ministru ho objetivu atu fó kapasitasaun ba tékniku profesionál sira.
Serimónia graduasaun, feto nain 16 no mane 11. Sira mai hosi Ministériu Estadu Rekursu Minerál, AIFAESA.IP, Prokuradória Jerál, Prokuradoria Direitu Umanu no Justisa (PDHJ-sigla portugés), Polísia Nasionál Timor-Leste (PNTL) no seluktán.
Jornalista: Zezito Silva
Editora: Rita Almeida
