iklan

EDUKASAUN

KDE-KP Aprova Regulamentu Interna ESJ 05 de Maio  

KDE-KP Aprova Regulamentu Interna ESJ 05 de Maio   

 

DILI, (TATOLI) – Konsellu Diretiva Eskola (KDE) no Konsellu Profesór (KP) inklui Konsellu Inan-aman, elabora no aprova Matadalan Regulamentu Interna (MRI) Ensinu Sekundáriu Jerál (ESJ) 5 de Maio no tama ona iha vigór hodi aplika ba estudante ativu sira iha eskola ne’e.

MRI ne’e kompostu husi kapítulu 10 ho artigu 28 ne’ebé ko’alia kona-ba obrigasaun estudante, saúde eskolár, kazu grave no kamaan, prinsípiu no responsabilidade inan-aman no termu no sansaun. Inklui, dever no obrigasaun, estrutura ezekuta ezame ka teste, inskrisaun ba estudante, prosedimentu transferénsia no norma adisionál sira.

“Artigu sira ne’ebé aplika iha lei ida ne’e relasiona ho asaun ka karatéristika pesoál estudante nian ne’ebé bele prejudika buat ruma ka inkompátivel ho norma umanitária sira”, refere MRI nu’udar afirmasaun ezekutivu ESJ 05 de Maio, Manuel Verdial, ajénsia TATOLI konfirma ohin iha ESJ 05 de Maio, Bekora.

Tanba ne’e tenke kumpri regra sira ne’ebé ezistente iha instituisaun edukasionál, importante liu hodi hadi’a realizasaun prosesu ensinu aprendijazen hodi alkansa massa dianteira nabilan ba nasaun no estadu.

Objetivu prinsipál mak kualidade no kredibilidade rekursu umanu iha prezenta no futuru ne’ebé bele alkansa liuhusi asesu edukasaun iha nível hotu, promove kresimentu demokrasia no dezenvolvimentu nasaun ida nian.

Profesór no edukadór sira sempre apoiu iha dezenvolvimentu sira-nia dever rasik atu prepara futuru, konsege harii nasaun ho futuru ida prósperu, pás, liberdade, demokrasia, no alta unidade nasionalizmu ba Nasaun.

“Ho nune’e lei ida ne’e aplika tuir diretriz sira ne’ebé eziste hodi alunu sira hotu bele apresia entre umanu sira seluk iha instituisaun edukasionál ida”, refere tan dokumentu ofisiál ne’e.

Iha MRI ne’e, husi artigu ida to’o 28, iha artigu 9 ko’alia kona-ba disiplina hatais manorin (profesór) sira nian. Katak, a) Manorin labele uza saia badak ka kalsa no saia levis; b) Manorin labele uza kamizola mai eskola, hodi hala’o kna’ar hanorin nian; c) Manorin na’in labele uza sinelus mai eskola hodi hala’o kna’ar hanorin nian no d) Manorin na’in tenke hatama faru ba laran, iha oras servisu públiku nian.

Nune’e mós, refere ba estudante sira, iha MRI ne’e mós ko’alia kona-ba obrigasaun, responsabilidade no sansaun ba alunu inklui kestaun relevante ba inan-aman no enkaregadu sira.

MRI ne’e aprova no legaliza hus KDE, reprezanta diretór eskola, Manuel Verdial, nia adjuntu, Maria dos Santos, Gabinete Apoiu Tékniku Crispina A. Sarmento no Prezidente Konsellu País, Tomé de Araújo Verdial.

Enkuantu, Konsellu Profesór, envolve profesór na’in 47 ne’ebé mak hanorin no fasilita prosesu aprendijazen iha estabelesimentu ensinu públiku ne’e.

Jornalista: Rafy Belo

Editora: Rita Almeida

iklan
iklan

Leave a Reply

iklan
error: Content is protected !!