DILI, (TATOLI) – Sekretáriu Estadu Juventude no Traballu, Nívio Leite Magalhães, hatete Governu Timor-Leste no Korea koordenadu ona katak traballadór ne’ebé iha komportamentu di’ak no serbisu ho responsabilidade bainhira remata ona kontratu no fila mai Timór sei fó tan oportunidade ba sira atubele tuir fali teste.
“Hanesan governante ida ne’ebé responsabiliza ba área ida ne’e, presiza hanoin atu oinsá maka bele haree kontinuidade husi programa ne’e liga ba traballadór ida filafali husi Korea, saida mak sira bele kontribui no halo ba ita-nia rai”, Nívio hatete iha Kaikoli bainhira halo sorumutuk ho traballadór Korea ne’ebé durante ne’e hala’o serbisu iha nasaun refere no kumpri akordu ne’ebé estabelese entre Governu Timor-Leste no Korea, ohin.
Enkontru ne’e atu rona sira-nia hanoin no esperiénsia durante serbisu, dezafiu saida mak hasoru, nune’e sai hanesan referénsia ida ba SEJT atu foti desizaun, nune’e programa ida ne’e sai di’ak liután.
“Ami rona buat barak husi sira no sei sai input ida, sei fó ideia mai ami atu hadi’ak programa ida ne’e”.
Trablladór ne’ebé fila ona mai Timor-Leste no rejistadu ona ne’e hamutuk 173 no SEJT husu atu sira rejistu filafali no sei konsidera sira iha selesaun tuirmai.
“Ida ne’e importante tebes no hanesan mensajen ida katak ba traballadór ne’ebé remata ona sira-nia kontratu Governu sei kontinua fó atensaun ba sira. Se komportamentu no serbisu di’ak Governu sei koordena no komunika ba Governu Korea no empregadór sira atubele konsidera, fó oportunidade ba sira dalaida tan hodi bele bá serbisu iha ne’ebá. Nomós ba sira ne’ebé karik lapasa teste no karik ba sira ne’ebé lakohi tuir teste ona, lakohi filafali ba Korea Governu mós sei halibur sira, sira bele estabelese sira-nia grupu atu nune’e kontinua fó apoiu sira”.
Fundu ba auto empregu nian ne’e Governu bele fó apoiu no sira bele loke negósiu atu nune’e sira mós bele sai fali empregadór hodi rekruta fali tan ema seluk no loke kampu traballu ba timoroan sira seluk.
Entantu ba timoroan ne’ebé seidauk bá no daudaun ne’e rejistadu atu kompete hodi bá hala’o serbisu pur volta 6000 resin no sei tuir teste ida ne’ebé nakloke, justu no haree kapasidade hodi prepara sira tuir kursu lia-korea.
“Ami mós rekolla dadus ba sira ne’ebé durante ne’e tuir ona kursu, hatama ona dokumentu, maibé seidauk rona rezultadu presiza esplika ba sira, tuir teste liu ka la’e tenke hatete ba sira, tanba sá sira la liu ne’e. Tanba ne’e mak ami sei asegura programa ne’e sei nakloke, fó oportuidade ba ema hotu hodi kompete atu nune’e sira bá serbisu iha rai-liur hodi bele hadi’a ekonomia família”.
Jornalista: Maria Auxiliadora
Editora: Rita Almeida
