DILI, (TATOLI) – Prezidente Komisaun Funsaun Públika (KFP), Faustino Cardoso, fó pose ba funsíonariu Ministériu Defesa no Seguransa (MDS) hamutuk 231 ne’ebé promovidu hosi grau G ba F no grau F ba E.
Funsionaríu hirak ne’e kompostu hosi diresaun protesaun sivíl, bombeiros, seguransa sivíl no administrasaun.
Prezidente KFP, Faustino Cardoso, hateten funsionáriu hirak ne’e maioria servisu ona iha tinan 2002 la-hetan promosaun ba grau.
ʺPromosaun ne’e atu sira sae grau hodi motiva sira liután hodi servisu ho responsabilidadeʺ, hateten Prezidente KFP iha edifisiu MDS Vila- Verde Ohin.
Emposadu 231 ne’e feto hamutuk 30 no mane 201 ne’ebé destakadu iha munisipiu 12 inklui Rejiaan Autonómu Espesial Oe-Kusi (RAEO).
KFP maka halo promosaun grau ba funsionáriu públiku tuir dekretu lei 1/2018 sei uza konkorsu eletróniku.
Entretantu, Ministru Defesa no Seguransa, Agostinho Sequira Somoxto, hateten ekipa hosi MDS no KFP maka halo selesaun ba funsionáriu emposadu ne’ebé hetan promosaun.
Jornalista: Agapito dos Santos
Editora: Rita Almeida
