DILI, (TATOLI) – Rádiu Akadémika hosi Universidade Nasionál Timor-Lorosa’e (UNTL) ho frekuénsia 90.00 MhZ, serbisu ho Sekretariadu Tékniku Administrasaun Estatál (STAE) aprezenta teatru edukasaun votante ba estudante UNTL iha jardin Liceu, ohin.
Objetivu ne’e enkoraja joven no estudante sira partisipa ho másimu iha eleisaun parlamentár antesipada 2018 ne’ebé sei hala’o iha 12 maiu.
“Estudante sira barak liu mak iha Dili nomós sira iha koñesimentu di’ak oinsá mak bele transmite informasaun di’ak ba sira-nia família, inan-aman, viziñu sira mak la rona informasaun. Entaun, ita fahe ba estudante universitáriu sira, sira transmite karik, transmite ho didi’ak”, hatete xefe departamentu edukasaun eleitorál STAE, Carceres Ximenes, ba jornalista sira.
Carceres hatutan nu’udar tékniku fasilita de’it prosesu. Tuir lei, estudante sira vota tuir jeográfia hanesan destaka iha kartaun eleitorál.
“Estudante sira ne’ebé laiha posibilidade, ami la prepara transporte. Ami buka esplika oinsá eleisaun ne’e, tuir votasaun karik, vota iha unidade jeográfika”, afirma Carceres hodi hatan ba preokupasaun estudante sira nian kona-ba viatura oinsá bele transporta sira.
Alumni Parlamentu Foinsa’e, Maria do Céu, perante akadémiku sira enkoraja atu partisipa iha eleisaun hodi ezerse direitu votu nu’udar sidadaun.
“Se loos mak atu ukun rai ida ne’e, ha’u fiar katak idaidak ho nia versaun (opsaun polítika), ita idaidak ho nia hakarak, ha’u husu ba kolega sira atu fó direitu votu ho loloos”, sujere.
Maria do Céu husu ba ninia maluk sira atu haree ba futuru, oinsá fó votu ba partidu polítiku ida ho visaun tau matan ba foin sa’e sira.
“Ita la haree ba pasadu, maibé ba futuru saida mak sira sei investe ba joven sira, ida ne’e mak ita tenke haree”, hatutan tan.
Atividade aprezentasaun teatru edukasaun votante, alende hala’o ona iha UNTL, sei hala’o mós iha universidade ka ensinu superiór sira iha kapitál.
Jornalista: Rafy Belo
Editora: Rita Almeida
