PD Promete Koopera Ho Oitavu Governu
DILI, (TATOLI)-Prezidente Partidu Demokrátiku, Mariano Assanami Sabino hateten, Partidu Demokrátiku (PD) sei kontinua koopera ho Governu foun (Oitavu Governu) hodi harii konstrusaun estadu no hadi’a dezenvolvimentu di’ak liután ba povu.
Asanami hato’o asuntu nee hafoin rona opiniaun hosi presidente Repúblika, Francisco Guterres Lú Olo kona-ba Primeiru Ministru indigitadu (sei segredu) ba governasaun da ualu ne’ebé aprezenta hosi Aliansa Mudansa ba Progresu(AMP),ohin iha Palásiu Prezidensiál Bairru Pité, Dili.
“Depois rona opiniaun hosi presidente Repúblika, PD mós fó hanoin ba Presidente Lú Olo katak se mak figura ida nee, maibé PD hakarak Estado ida nee ba oin no koopera nafatin para serbisu di’ak ba oin, “ Assanami esplika tuir tan maski la temi se mak atu sai primeiru ministru, tanba nia lakohi ultrapasa kompeténsia Prezidente Repúblika nian.
“Importante ba ita hotu maka hamutuk konstrui ita nia rai nee di’ak liu tan no di’ak ba povu tomak. Mézmu la hola parte iha governu, ba dezenvolvimentu partidu jerasaun foun nee hakarak koopera nafatin hodi hametin unidade iha rai laran,” Prezidente PD promete.
Jornalista: Agapito dos Santos
Editór : Manuel Pinto
