DILI, (TATOLI) – Deputadu lejislatura da-lima, Duarte Nunes, hatete Prezidente partidu Kongresu Nasionál Rekonstrusaun Timor (CNRT-sigla portugés), Kay Rala Xanana Gusmão, sei defende kandidatu membru governu ne’ebé Prezidente Repúblika, Francisco Guterres Lú Olo, veta.
“Xanana Gusmão mak propoen kandidatu membru governu hosi CNRT nian, nia tenke defende”, katak Duarte Nunes ba jornalista sira iha uma fukun Parlamentu Nasionál, ohin.
“Razaun saida mak prezidente veta fali kandidatu hirak ne’e, nusa mak iha lejislatura anteriór, membru balun mós iha situasaun hanesan ne’e, tanba saida mak la aplika iha momentu ne’eba”.
Tuir deputadu ne’e Xanana mak iha kompenténsia atu husu tuir, tanba propozita ne’e hosi nia (Xanana), konserteza nia iha responsabilidade atu buka hatene, se karik atu substitui ne’e ho razaun saida.
Duarte komenta tribunál mak hatene ema ne’e sala ou la’e, tanba Timor-Leste hanesan Estadu Direitu Demokrátiku ho nia orgaun soberania haat, Prezidente Repúblika, Parlamentu Nasionál (Legislativu), Governu (Ezekutivu) ho Tribunál (Judikativu), ho separasaun poder katak respeita parlamentu no tribunál. Tanba ne’e, atu sala ka loos ne’e kompeténsia tribunál nian.
Maibé nia espera tempu badak lideransa sira bele tur hamutuk hodi ko’alia atu solusiona, tanba Estadu ne’e tenke funsiona atu ema lebele dehan Estadu falladu.
“Ita seidauk hetan informasaun loloos katak bainhira mak solusiona, hein katak tempu badak sira bele rezolve no kandidatu hirak ne’e bele hetan toma ona pose atu funsionamentu orgaun Estadu bele la’o di’ak ka bele hakotu krize polítika”, hateten.
Maibé, nia dehan bainhira prosesu ne’e mak dada nafatin, povu nafatin konfunde ho situasaun polítika. Maibé garante katak tempu badak bele iha ona desizaun hodi prezidente bele dekreta hodi fó pose ba kandidatu membru governu da-ualu ne’ebé durante ne’e vetadu.
Nia esplika tan Xanana mós ladauk simu pose, hanesan asaun solidaridade. Tanba nia membru sira ne’ebé nomea seidauk hetan pose.
Tuir nia, ne’e obrigasaun Xanana nian hodi hola pozisaun no labele husik sira depois ba uluk, nia hanesan aman entaun nia haree di’ak hotu mak ba ho sira.
“Se prezidente mantein pozisaun, depende ba desizaun hosi AMP nian atu buka solusaun hamutuk”, espera.
Jornalista: Zezito Silva
Editora: Rita Almeida
