DILI, (TATOLI)-Ministru Agrikultura no Peska, Joaquim José Gusmão dos Reis Martins, hatete Orsamentu Jerál Estadu 2018 ne’ebé aloka ba Ministériu Agrikultura no Peska (MAP) ho totál millaun hitu resin ne’e, rihun 194 atu selu de’it projetu sira ne’ebé finaliza ona.
“Saláriu no vensimentu 6.5, bens no servisu 3.2, tranferénsia públika laiha, kapitál menór laiha, kapitál dezenvolvimentu mak 194 mil só para selu de’it projetu ne’ebé hotu ona. Tanba fulan haat de’it, ita labele iha procurement (akizisaun) tanba ne’e maka barak liu MAP nian ne’e só para kontinuasaun programa sira ne’ebé hala’o tiha ona”, Joaquim afirma iha Tibar foin lalais ne’e.
Ho montante osan ne’ebé prevee ba MAP, ministru dehan dentru fulan haat ne’e garante hodi bele ezekuta tanba ida ne’e kotinuasaun de’it no laiha projetu ne’ebé halo konkursu públiku foun.
Nia hatutan MAP iha prioridade atu hasa’e produsaun, maibé fulan haat de’it sei labele halo buat ida.
Iha parte seluk hatán kona-ba ró ilegál ne’ebé hana’uk ikan iha tasi mane ne’ebé deputadu sira kestiona, ministru dehan Timór laiha rekursu atubele kombate peska ilegál ne’e.
“Tanba ne’e maka iha ideia ida atu harii autoridade marítima nasionál, servisu hamutuk ho Ministru Defeza, ministériu sira seluk, Ministériu Negósiu Estranjeiru para iha mós kooperasaun. Ita rasik rekursu lato’o”.
Jornalista : Maria Auxiliadora
Editór : Manuel Pinto
