PM Louva Kolaborasaun Opozisaun Iha Debate OJE 2018

DILI (TATOLI)— Primeiru-Ministru Taur Matan Ruak louva tebes ba deputadu opozisaun sira nia kolaborasaun iha durante debate Orsamentu Jeral Estadu (OJE) 2018 hahú hosi jeneralidade, espesialidade to’o final global.

“Ha’u hakarak louva no hahi’i ilustres Deputadu/a sira hotu ne’ebé mak intervein atu hadi’a dokumentu ida-ne’e, liu-liu ba opozisaun nia kolaborasaun, ne’e hatudu katak maski ita iha hanoin no ideolojia polítika ne’ebé la hanesan, maibé hotu-hotu kontinua haka’as an atu halo ita-nia rai doben Timor-Leste sai país ida justu, inkluzivu, moris-di’ak no dezenvolvidu liután.”

“Maski dúvida barabarak ne’ebé hato’o ona kona-ba kapasidade ezekusaun nian, tanba haree prazu tempu nian ne’ebé badak tebes, ha’u repete fila-fali ami-nia determinasaun ne’ebé firme no metin kona-ba ami-nia esforsu atu implementa orsamentu ne’e, ho dalan ne’ebé kuidadu, responsavel, efikás no efisiente, tuir prátika hirak ne’ebé di’ak liu kona-ba transparénsia públika”, PM Taur Matan Ruak, hato’o liuhosi komunikadu imprensa ne’ebé TATOLI asesu, ohin.

Xefe Governu hatutan “Ami hakarak mobiliza apoiu husi setór oin-oin husi ita-nia ekonomia no sosiedade, atu nune’e bele alkansa objetivu jerál husi Orsamentu Jerál Estadu tinan 2018 nian ida-ne’e, ne’ebé ho lia-fuan badak dehan atu halo kondisaun moris sidadaun sira-nian sai di’ak liután, ho asesu no prestasaun servisu báziku sira (edukasaun, saúde, integrasaun sosiál, bee no saneamentu, eletrisidade, infraestrutura no meiu ambiente) ne’ebé di’ak liu, ne’ebé bele kontribui ba objetivu boot nasionál atu hasai Timor-Leste husi grupu nasaun sira ho rendimentu baixu, hodi koloka fali iha grupu rendimentu médiu-aas sira nian”.

OJE 2018 aprova iha final global ho votu a favor 42, abstensaun 14 no kontra 9.

Ekipa Redasaun