DILI, (TATOLI) – Diretór Nasionál Regulasaun Komersiál Ministériu Turizmu, Komérsiu no Indústria (MTKI), Domingos da Costa Soares, hatete atividade negósiu online hanesan perturbasaun iha miléniu ida ne’e, tanba ne’e parte governu tenke haree.
“Negósiu ne’e nia impaktu negativu barak, primeiru seidauk hetan legalidade harii negósiu iha Timor-Leste, negósiu refere talvés laselu taxa, nia halo negósiu gratuita de’it, seluk nia nunka fó serbisu ba ema seluk, nia serbisu ba nia án rasik, entaun negósiu ida ne’e mosu dalaruma fó ameasa ba negósiu sira ne’ebé mak legál, entaun parte Governu tenke haree”, katak diretór iha Bebora, ohin.
Tanba negósiu legál ne’ebé mak iha fó serbisu ba ema, selu taxa ba Estadu no bele tranzmite kapasidade ba timoroan sira no prepara ema atu sai hanesan negósiu na’in.
“Negósiu online ne’e mosu talvés estraga buat sira ne’ebé iha, entaun ida ne’e parte ida ne’ebé Governu tenke hadi’a maski lei balun iha ona, maibé presiza lei espesífika balun para ita bele regula asuntu ida ne’e”.
Durante ne’e negósiu online ne’ebé iha liuliu ai-moruk, roupa no produtu seluk dalaruma nia na’in la’ós iha Timor-Leste, maibé utiliza timoroan mak halo negósiu hirak ne’e, enkuantu lukru boot ba hotu ema ida ne’ebé akumula iha rai seluk.
“Ita-nia ema Timór sira ne’e sira utiliza hanesan empregadu, tanba ema negósiu boot hanesan ne’e tur iha rai-seluk, mas ita nunka hatene fonte negósiu nia na’in loloos ne’e iha ne’ebé lahatene, tanba ne’e presiza hatene liuliu ba ai-moruk. Kuandu ema konsome ai-moruk ne’e mak iha problema ruma sé mak atu responsabiliza ba ida ne’e? Ita-nia timoroan sira ne’ebé mak fa’an ka ema ne’ebé halo produsaun ita lahatene? Entaun ida ne’e maka presiza haree”.
Nia hatutan tan bainhira atu promove protesaun direitu konsumidór, presiza mós defende sira-nia direitu, tanba Timór seidauk halo kontrolu ida di’ak, nune’e oportunidade di’ak ba negósiu ida ne’e, maibé iha tinan ida ne’e bá oin tenke foku hodi toma atensaun ba ida ne’e.
“Atividade ida ne’e la’o kle’ur, tanba saida maka asaun sira ne’e kadavés neneik, tanba negósiu na’in sira ne’e ho nia estratéjia sempre mai ho sistema ne’ebé preparadu. Entaun ami iha rekursu natoon para kontrola atividade sira ne’e atu labele fó imajen ladi’ak ba ita-nia nasaun no halo perturbasaun ba negósiu legál sira ne’ebé maka agora iha atu taka maka ami tenke prevene”.
Nune’e sistema ida atu kontrola maka liuhusi market intelligence, liuhusi knaar kadeia valór no inspesaun no fiskalizasaun. “Ida ne’e ami la’o ona, maibé seidauk másimu. Agora ami tenke foku ba negósiu online ida ne’e”.
Jornalista: Maria Auxiliadora
Editora: Rita Almeida
