SEK Prefere Harii Sentru Kooperativa Ida Maibé Iha Ramu Barak Iha Laran

DILI, (TATOLI)-Sekretáriu Estadu Kooperativa (SEK), Arsénio Pereira da Silva, prefere harii modelu kooperativa ne’ebé iha sentru kooperativa ida de’it, maibé iha ramu kooperativa barak mak iha laran.

“Hakarak liu mak modelu kooperativa ida oinsá para husi Governu nian mai, bá iha kooperativa depois nia membru sira mai hotu iha sentru tanba grupu ki’ik-ki’ik mak halo ida-idak ninian ne’e maka ita halo produsaun ne’e ki’ik”, Arsénio katak iha Bebora, ohin.

Tanba ne’e modelu ida ne’ebé bá oin atu halo maka husi SEK hahú la’o ona ba sentru kooperativa sira ne’e no tuir planu asaun Timor-Leste iha postu hamutuk 65, entaun sei tau sentru kooperativa ida de’it iha kada postu.

“Depois ida sei iha kooperativa nivel nasionál. Tuir ita-nia lei tenke iha kofederasaun ne’ebé agora la’o ona, maibé ho modelu ida ne’e foku ba kooperativa mak kooperativa produsaun ba produtu agríkola nian, peska nian, pekuária, haki’ak manu niaN ne’e mai husi kooperativa produsaun. Ida ne’e mak sei foku ba ne’ebá sai hanesan tarjetu ba programa Oitavu Governu nian nomós iha planu ba to’o tinan lima ne’e ekonómikamente membru kooperativa sei iha mudansa”, katak.

Hatutan bainhira harii koperativa ki’ik-ki’ik no dook malu sei susar atu sukat no lahatene nia progresu, entaun ho dezeñu maka harii sentru iha postu ida.

“Ne’ebé iha suku ida balun hakarak halo kréditu uniaun, haki’ak ikan, kuda modo, ai-fuan, orsida ne’e mai hanesan kooperativa ida para nia jestaun kooperativa iha postu nian ne’e ida, maibé nia atividade oioin. Ramu kooperativa oioin mak sei iha okos depois fasil ita hatete, kontrola, apoiu sira ne’ebé bá mós klaru ona iha ne’ebá”.

Arsénio haktuir iha nia programa sei foku liu iha shorgum ne’ebé mak iha sentru ne’e mak sei sai sentrál ba produsaun, distribuisaun, prosesamentu no aprendijazen.

“Ne’e hafasil ema mai hasoru malu, koopera malu iha ne’e duké ida-idak la’o ninian Governu kontrola lahetan, fó apoiu ba mós dalaruma labele ba kontrola depois kooperativa sira lala’o di’ak”.

Jornalista : Maria Auxiliadora

Editór : Manuel Pinto