DILI, (TATOLI) – Primeiru-Ministru, Taur Matan Ruak, hateten sei rezolve situasaun polítika ne’ebé akontese iha rai-laran hodi dezenvolve Nasaun.
Xefe Governu hato’o kompromisu ne’e hodi hatan ba preokupasaun estudante Universidade Nasionál Timor Lorosae durante sai oradór ho tópiku reafirmasaun valór rezisténsia ba libertasaun Nasaun no prosesu dezenvolvimentu nasionál iha kampus sentrál UNTL, ohin.
ʺHau kontente apezar ita iha difikuldade no kontente ho evolusaun ne’e, ha’u fiar hosi ne’e ba oin sei la’o di’ak liuʺ, afirma.
Mudansa polítika rai-laran durante tinan 1 resin la’o di’ak maske iha diferensia opiniaun, maibé ida ne’e parte ida hosi prosesu dezenvolvimentu demokrasia.
Tuir eis-Prezidente Repúblika ne’e hateten situsaun pólitika ne’ebé akontese entre lideransa sira ne’e parte ida hosi prátika demokrasia hodi hamosu diversidade opiniaun hodi dezenvolve di’ak liután Nasaun.
ʺSe ita kompara dezenvolvimentu polítika Timor nian iha ázia Timor-Leste sai ezemplu, ita labele hanoin demokrasia ne’e ema hothotu mai ho hanoin hanesan ne’e la loos, maibé demokrasia pilar ida importante ba diversidade opiniaunʺ, tenik tan.
Mesmu iha opiniaun ne’ebe diferente, maibe la ses hosi lei no regulamentu ne’ebé eziste no vigora iha rai-laran.
ʺTimor halo esforsu boot ida para kontinua la’o ba oin, la’ós de’it harii Nasaun, maibé prátika demokrasia, prinsípiu prátika demokrasia ne’e ida maka respeita, toleransia, diversidade opiniaunʺ, esplika Taur Matan Ruak.
Jornalista: Agapito dos Santos
Editora: Rita Almeida
