DILI, (TATOLI) – Embaixadór Timor-Leste (TL) ba Filipina, José Gaspar Piedade, hala’o vizita kortezia ba Prezidente Repúblika (PR), Francisco Guterres Lú Olo, ko’alia kona-ba konferénsia rejionál edukasaun.
Nia dehan estadia iha Timor atu atende konferénsia rejionál edukasaun ho naran South East Ministers of Education Organization (SEMEO), ne’ebé sei involve Ministériu Edukasaun sira iha AZEAN laran.
Konferénsia ne’e, José esplika sei hala’o iha 2 to’o 4 outubru tinan ne’e iha Dili no Timor-Leste maka sai hanesan uma na’in.
“Tinan-tinan SEMEO hala’o konferénsia ida ne’e ho objetivu halo avaliasaun ida kona-ba kampu edukasaun ninian para identifika difikuldade sira ne’ebé membru SEMEO sira iha no aumezmu tempu formaliza orsamentu atu sustenta membru sira ne’ebé hetan difikuldade iha tinan tuir mai”, dehan ba jornalista sira iha Palásiu Prezidente Nicolau Lobato, Bairru Pité, tersa ne’e.
Aleinde ne’e, objetivu vizita kortezia ne’e mós nia atualiza ba Prezidente Repúblika kona-ba estudante timoroan sira iha Filipina ne’ebé aproveitamentu di’ak iha universidade sira iha Filipina.
Embaixadór ne’e haktuir porsentu 70 hosi estudante timoroan hamutuk 276 ne’ebé estuda iha Filipina hola ramu enjeñaria ba konstrusaun sivíl, IT, agrikultura no porsentu 5 to’o 7 estuda iha área siénsia sosiál ho nia ramu maka teolojia no filozofia ninian.
“Sistema edukasaun Filipina ninian ne’e ita bele rekoñese katak sistema di’ak, tanba universidade sira iha Filipina sempre iha koordenasaun ho serbisu imigrasaun Filipina ninian, katak, estudante timoroan sira ne’ebé maka notas ladi’ak, automátikamente imigrasaun la prolonga sira nia visa”, esklarese.
Iha biban ne’e, Xefe Estadu fó orientasaun ba embaixadór refere ho sentidu aprosima nafatin ba komunidade timorense iha Filipina no Xefe Estadu mós kontente tebes bainhira rona estudante timoroan sira ne’ebé eskola iha Filipina iha aproveitamentu di’ak, tanba timoroan ida hasai nia kursu enjeñaria iha Filipina ho klasifikasaun summa–comlaude.
Jornalista: Xisto Freitas
Editora: Rita Almeida
