DILI, (TATOLI)-Governu Konstitusionál Daualuk kumpri ona kalendáriu hodi submete proposta Lei Osamentu Jerál Estadu (OJE) 2019 ho montante $1.827 biliaun ba Parlamentu Nasional (PN) iha 8 novembru 2018.
Submisaun proposta ne’e liuhusi Ministériu Reforma Legislativa no Asuntu Parlamentar, Fidelis Manuel Leite Magalhães no Ministra Finansas en ezersísiu, Sara Lobo Brites.
OJE tinan oin ne’e aloka ba kategoria lima mak hanesan Sálariu no Vensimentu millaun $214,046, Bens no Servisus millaun $478,262, Transferénsia Públika millaun $705,117 inklui sosa asaun ConoccoPhillips millaun $350, Kapitál Menór millaun $29,401 no Kapitál Dezenvolvimentu millaun $400,173 inklui impréstimu millaun $87.
“Orsamentu ne’e fó prioridade ba infraestrutura, bee moos, eletrisidade inklui mós sosa asaun Greater Sunrise husi ConoccoPhillips”, Vise-Ministra informa iha Parlamentu Nasionál horisehik, hafoin entrega proposta OJE ba Prezidente PN, Arão Noé.
Dokumentus hosi proposta Lei OJE 2019 ne’ebe submete ba PN mak Livru 1 Planu Orsamentu, Livru 3A kona-ba Fundu Infraestrutura, Livru 5 Parseiru Dezenvolvimentu, Livru 6 Fundu Dezenvolvimentu Kapitál Umanu (FDCH).
Alén de ne’e, livru sira seluk ne’ebe seidauk entrega ba PN mak hanesan Livru 2 Planu no Programa, Livru 3B Despeza Munisípiu, Livru 3C Despeza RAEOA no Livru 4AB Detalla Despeza.
“Gradualmente ami informa ona ba Prezidente Parlamentu tanba livru 2 no 4 ne’e kompleksu uitoan, ne’e la’ós Ministériu Finansas mak prepara, mas ne’e tenke serbisu ho ministériu hotu-hotu, ida ne’e maka lori tempu depois tenke tradús, imprime depois haruka mai, mas ami sei submete antes de plenária”, katak.
Sobre ezekusaun OJE 2018, Ministra Finansas en funsaun ne’e dehan la’o di’ak no tuir ritmu ne’ebé iha no espera to’o iha finál tinan ne’e bele ezekuta maioria husi orsamentu ne’ebé aloka.
Entretantu Portál Transparénsia Timor-Leste daudaun ne’e seidauk disponivel hodi públiku bele asesu ezekusaun orsamentu tanba sei halo hela manutensaun no brevemente sei online fali.
Jornalista : Maria Auxiliadora
Editór : Manuel Pinto
