DILI, (TATOLI) – Konsellu Ministru, ohin aprova delegasaun poder ba Sekretariu Estadu Komunikasaun Sosiál (SEKOMS) hodi aselera prosesu implementasaun akordu ho Governu Xina hodi hahú digitaliza Radiu Televizasaun Timor-Leste, Emprensa Públika (RTTL, EP) iha tinan oin.
Projetu ne’e hetan apoiu osan hosi Governu Xina ho montante milliaun dollar lima. “Ami aprejenta ba konsellu ministru ohin kona-ba akordu implementasau, konsellu ministru aprova pedidu ne’e, nivel tékniku ita sei ko’alia ho governu Xina atu ko’alia hodi asina akordu ba implementasaun”, katak Sekretáriu Estadu Komunikasaun Sosiál, Merício Juvinal dos Reis Akara, iha Palasíu Governu.
Repúblika populár Xina sei hahú dahuluk konstrusaun estasaun rua hodi halo transmisaun ba televizaun dijitál iha kapitál no área sira seluk.
“Ohin tuku haat reprejentante Governu Xina sei hasoru ha’u hodi informa kestaun operasionál, bainhira maka atu hahú”, tenik Akara.
Governu Xina mós konkorda ona implementa projetu ne’e, no termina iha 2019. Hosi akordu ne’e, TL sei responsabiliza selu taxa iha portu bainhira ekipamentu to’o iha rai-laran, área konstrusaun, seguransa.
Governante ne’e realsa implementasaun projetu ne’e sei hetan kooperasaun servisu mós ho ministériu relevante hanesan Ministériu Negosiu Estranjeiru no Kooperasaun (MNEK), Ministériu Finansa no seluk tan.
Enkuantu ohin KM mós aprova proposta dekretu lei organika ba MNEK. Nune’e mós aprova alterasaun dekretu lei 14/2004 , loron 1 setembru kona-ba ezersísiu ba profisaun saúde hodi hadi’a validade ba rejistu profisionál saúde ba sidadaun timoroan ne’ebé antes hala’o kada tinan lima maibé altera kada tinan rua.
Aprova mós rezolusaun Governu ne’ebé aprejenta hosi ministériu defeza kona-ba memorandu entendimentu ho governu Austrália hodi apoiu ekipamentu komunikasaun no formasaun ba elementu F-FDTL ba operasaun ekipamentu refere.
Jornalista: Agapito dos Santos
Editora: Rita Almeida
