DILI, (TATOLI) – Sekretáriu Estadu Ambiente (SEA), Demétrio de Amaral de Carvalho, no reprezentante Programa Nasaun Unida ba Dezenvolvimentu (PNUD), Claudio Providas, asina projetu haforsa kapasidade institusionál hodi reforsa monitoramentu no avaliasaun ba projetu sira ne’ebé implementa.
“UNDP ho ambiente dezenvolve projetu ne’e iha tinan sira bá kotuk no konsege hodi mai Timor-Leste milliaun 1.4 ne’ebé GF LDC Farm mak apoiu, UNDP mós aumenta nia rekursu kuaze 200 mil dólar, nune’e totál projetu ne’ebé administra husi UNDP maizumenus milliaun 1.6 dólar amerikanu no Governu Timor-Leste halo ko-finansiamentu atu asegura implementasaun projetu ne’e”, Demétrio katak hafoin asina dokumentu projetu ne’e iha Bebora, ohin.
Projetu ne’e iha komponente sira maka hanesan sei halo treinamentu ba ekipa interministeriál sira relasiona ho monitoriamentu no evaluasaun, ida seluk maka sei dezenvolve website hodi halo atualizasaun informasaun sira kona-ba serbisu, seluk maka reforsa kuadru (framing) legál ne’ebé Timor-Leste ratifika.
“Tanba Timor-Leste ratifika ona konvensaun Rio Tolu no husi obrigasaun konvensaun ne’e Timor-Leste tenke halo tuir, tanba ne’e presiza reforsa saida maka ita bolu kerangka (kuadru) legál sira tuir UN nian ne’e”.
Nia hatutan tan: “Ezemplu, ita presiza lei kona-ba Biodiversidade ohin loron iha hela draft (esbosu), ita presiza lei kona-ba kontrola poluisaun sira ne’e hotu iha akordu ida ne’e. Ita espera sira bele iha kondisaun di’ak atu asegura ita-nia progaram sira ne’ebé Orsamentu Jerál Estadu labele kobre”.
Eis deputadu ne’e afirma projetu ne’e sei implementa husi 2018 to’o 2022 ne’ebé liga barak liu ba ambiente no PNUD maka sei halo jestaun no sira sei halo rekrutamentu ba tékniku sira nomós konsultan internasionál balun hodi tau-matan ba projetu ne’e.
Jornalista: Maria Auxiliadora
Editora: Rita Almeida
