DILI, (TATOLI) – Tékniku sira husi Ministériu Finansas (MF) halo hela kálkulu para bele fó apoia ba ministériu ne’ebé maka daudaun ne’e iha saldo ki’ik para bele selu saláriu no désimu terseiru nian.
Nune’e Vise-Ministra Finansas, Sara Lobo Brites, dehan relasiona ho pagamentu ba saláriu ne’e sei selu.
“Hotu-hotu akompaña, ita iha hela duodésimu ida naruk ne’ebé maka duodésimu bazea ba estrutura orsamentál 2017, depois orsamentu 2018 promulga ita tenke konta hotu despeza ne’ebé maka akontese iha duodésimu, entaun mudansa sira ne’e akontese iha diresaun ou ministériu balun iha tiha ona sistema laran, prosesu balun iha klaran tiha ona hanesan CPV ka commitment (kompromisu), obrigasaun balun ne’ebé maka akontese tiha ona durante duodésimu”, Sara afirma iha Parlamentu Nasionál, ohin.
Nune’e bainhira tranzita gastu sira iha duodésimu ne’e ba orsamentu 2018 nian ne’e afeta.
“Mas ida ne’e solusaun iha, ministériu ida-idak tenke iha ida-idak nia parte halo ezersísiu internál para bele dezblokeia tiha commitment ka obligasi (obrigasaun) sira ne’e, ho nune’e sira-nia osan to’o para bele selu saláriu ou sasán ne’ebé maka urjente liu”, katak
Ministra Finansas en ezersísiu ne’e hatán bainhira osan sira ne’e sei foti husi iten balun atu kobre saldo ne’ebé mínimu atu halo pagamentu katak lei permite porsentu 20 atubele halo transferénsia internál para bele taka.
“Ministériu ida ne’ebé konforme nia, negativu ida ne’ebé nia foti husi item ida muda ba item ida, ha’u labele bá dehan ida ne’e”.
Diresaun Jerál Tezouru MF iha Diresaun Nasionál Pagamentu liuhusi Departamentu Payroll prodús relatóriu previzaun utilizasaun orsamentu ho dadus despeza salariál novembru 2018 nian ho naran Payroll Analysis By Ministry, Directorate and Division Report ne’ebé hatudu katak ho montante salariál hanesan novembru tinan ne’e ba fulan sira tuirmai ne’e, orsamentu iha liña ministeriál, Ajénsia Autónoma no Munisípiu balun lasufisiente atu obre despeza pagamentu no saláriu to’o fin anu inklui désimu terseiru iha 2018.
“Nune’e husu liña ministeriál, Ajénsia Autónoma, Munisípiu hotu atu fó atensaun másima ba ezekusaun orsamentu saláriu no vensimentu iha instituisaun no foti asaun nesesária no koordena ho Diresaun Nasionál Orsamentu MF hodi halo virement hodi evita orsamentu ne’e akontese iha fulan hirak tuirmai bainhira prosesa saláriu funisionáriu sira-nia no rezulta pagamentu tarde”, refere karta ne’ebé Tatoli asesu.
Sobre sistema Free Balance ne’ebé atu taka, Vise-Ministra dehan tanba orsamentu anuál, signifika iha 31 dezembru ezekusaun taka no osan ne’ebé lagasta kaduka iha fin anu, pur tantu para to’o iha fin anu dezembru ema tenke iha tempu hodi halo prosesu sira.
“Tanba ne’e maka ita-nia kalendáriu ba fin anu ne’e 30 novembru taka ba CPV (Commitment and Payment Voucher ou Kompromisu no Fatura Pagamentu) no 20 dezembru taka ba pagamentu, maibé ida ne’e ba de’it ida liña ministériu. Sira ne’ebé maka Ajénsia Autónoma ou Munisípiu sira kontinua prosesa to’o 31 mak foin taka”.
Jornalista: Maria Auxiliadora
Editora: Rita Almeida
