DILI, (TATOLI) – Timor-Leste liuhusi Autoridade Inspesaun no Fiskalizasaun Atividade Ekonómika no Sanitária (AIFAESA) hahú ohin asume knaar nu’udar Prezidente Fórum Inspesaun Seguransa Alimentár no Atividade Ekonómika (FISAAE) iha Komunidade Nasaun sira ne’ebé ko’alia Lian-Portugés (CPLP, sigla iha portugés) durante tinan rua.
Koordenadór AIFAESA, Abílio Oliveira Sereno, informa tuir estatutu FISAAE katak sé maka nu’udar vise-prezidente nia mak sai hanesan organizadór ba fórum, tanba ne’e AIFAESA realiza fórum dalimak iha Timor-Leste atu hili prezidente no vise-prezidente foun, tanba antes Timor-Leste prezide FISAAE, Autoridade Seguransa Alimentár no Ekonómika (ASAE) Portugál mak sai prezidente no nia vise mak AIFAESA Timor-Leste rasik.
“Ohin membru FISAAE halo reuniaun para haree sé maka sai fali vise-prezidente tanba ami hanesan vise-prezidente, asume prezidente FISAAE nia komesa ohin, entaun tenke hili fali vise-prezidente ida no ami hanoin komu falta kuorum tanba ami-nia membru ne’e na’in-sia soké Portugál, Timor-Leste ho Angola maka ohin iha, tenke nia mínimu na’in-6, komu laiha kuorum ami labele deside buat ida, bele halo transferénsia prezidénsia mai AIFAESA maibé nia vise-prezidente bele hanoin de’it tanba falta de’it Giné-Bisau ho Saun Tomé no Prínsipe nunka asume prezidénsia, ami propoen Saun Tomé, sira konkorda nia sai vise-prezidente”, Abílio afirma hafoin ekontu ho membru husi Portugál no Angola iha Matadouru.
Atu halo pasajen prezidente ba Timor-Leste no hili nia vise maka AIFAESA halo fórum dalimak ne’ebé sei hala’o iha aban ne’ebé membru hotu ne’ebé ko’alia língua portugéza liuliu sira ne’ebé iha inspesaun ekonómika no seguransa alimentár partilla informasaun, esperiénsia ba malu para hatudu nasaun ida-idak nia serbisu oinsá, nune’e bele hatene país balun nia frakeza no susesu iha saida.
“Reuniaun hanesan ne’e kada membru hatudu nia esperiénsia durante tinan rua. Sira bele haree kuandu ita husu ajuda ba membru sira seluk ne’e orsida hatene katak Timór ne’e presiza saida. Hanesan Portugál, Kabu-Verde ne’e esperiénsia barak ona entaun sira hatene Timór ne’e presiza saida. Ita laboratóriu laiha, ita-nia modelu inspesaun ne’e hanesan sira-nian ona ka la’e, keta presiza buat ruma, mezmu en termu kapasidade ita-nia inspetór sira to’o iha ne’ebé? Kuandu ita presiza ajuda husi sira seluk fásil para entende ona liuhusi fórum ne’e”, katak.
Tanba ne’e ba membru hotu liuliu AIFAESA sei aproveita vantajen ne’e hodi hatudu ba sira seluk sobre nia serbisu durante tina rua iha área inspesaun ekonómika no serbisu seluk, saida maka nia halo no falta tanba bainhira nakloke informasaun kona-ba serbisu AIFAESA nian, nasaun sira ne’ebé avasadu ona ne’e entende Timor-Leste nia nesesidade tanba membru hotu iha laboratóriu, maibé Timor-Leste laiha.
“Sira husu ba ami laboratóriu iha ka la’e? Ami dehan laiha, sira hakfodak tebes tanba inspesaun ne’e kuandu laboratóriu laiha difisil. Halo oinsá maka bele defende kualidade ai-han se ó rasik laiha laboratóriu”.
Antes fórum ne’e hala’o iha Timor-Leste, realiza ba dahuluk ona iha Kabu-Verde iha 2013, 2014 iha Mosambike, 2015 iha Angola, 2016 iha Portugál no 2018 iha Timor-Leste.
Jornalista: Maria Auxiliadora
Editora: Rita Almeida
