UNIJMA Preokupa Ba Seguransa Marítima

DILI, (TATOLI)—Grupu Uniaun Nasionál Juventude Maubere (UNIJM)/Ativista Pro-RDTL liuhusi nia portavóz, Gil Ferdes, hateten ohin loron ema barak ko’alia ho ibun nakonu kona-ba RDTL nian Soberania Marítima maibé la hanoin Seguransa Marítima ne’ebé sei mamuk hela.

Nia dehan RDTL nia soberania ka seguransa marítima no aereu mosu nu’udar nesesidade urjente, nune’e tenke atende lalais, liu-liu sosa lalais fragata ida ka rua nu’udar barku militár ne’ebé bele tama kualker tasi hodi halo seguransa no hein fronteira marítima ka bele hasoru kualker pirataria marítima.

“Presiza mós sosa helikoptru ida ka rua ho kapasidade ba seguransa aereu hodi halo komunikasaun ka koordenasaun hosi lalehan, rai ho tasi. Helikoptru ne’e bele semo ás no semo badak , loron no kalan, bele para iha anin leten, iha barku leten, iha foho tutun, foho nia hun no ailaran bainhira hala’o nia misaun”, Ferdes ba jornalista sira liuhusi konferénsia ba imprensa ne’ebé hala’o iha sede UNIJMA, Manleuana, kuarta ne’e.

Tanba ne’e, nia rekomenda ba Estadu no Governu presiza reforsa orsamentu ba Ministériu Defeza no Seguransa ho osan hosi fundu ka tezouru nasionál, hodi atende nesesidade urjente ne’e.

Sé osan la to’o, nia prefere presiza hatún fali ukun na’in sira nia atuál saláriu ezorbitante (luar biasa) ba vensimentu mensál uluk nian, sura ho empreza públika durante tinan ida ka rua, hapara pensaun vitalísia ka kareta luxu, hodi bele sosa kotu sasán sira ne’e.

Aleinde ne’e, nia mós preokupa ba aeruportu ne’ebé Estadu no Governu halo iha Timor laran hanesan Dili, Oe-Cusse, Suai, Baucau no sei aumenta ba fatin seluk, maibé seidauk iha aviasaun hodi aproveita aeruportu hirak ne’e.

“Estadu no Governu ne’ebé loke aeruportu barak presiza fó atensaun másimu, konta ho povu tomak nia vijilánsia, atu labele husik poténsia estranjeira balun ne’ebé iha situasaun ruma bele aproveita hodi tau nia baze militár iha ita nia rain”, subliña.

Entretantu, nia afirma, atu labele repete kazu polísia tiru joven balun iha Kuluhun Kraik, semana balun liu-ba, ukun na’in sira tenke buka solusiona loloos hosi nia kauza rasik, liu-liu kauza imediata no kauza remota.

“Husu ba Estadu no Governu atu labele haree de’it ba kazu ne’e nian kauza imediata kona-ba autór ne’ebé komete krime, maibé tenke haree mós ba nia kauza remota ligada ba ema ne’ebé kaer komandu hodi impoin konsiénsia no disiplina ba nia membru ka kontrola Estadu nia kilat”, Ferdes tenik.

Nia salienta, presiza mós hadi’a lei orgánika ba PNTL ne’ebé malae mutin sira husik hela, hodi bele regula ho di’ak ka haklaken loloos polísia nia funsaun, tanba PNTL la’ós militár nomós la’ós polísia militár.

Jornalista: Xisto Freitas

Editora: Rita Almeida