DILI, (TATOLI) – Governu da-ualu la konsege apoiu osan ba mídia nasionál sira iha tinan ne’e tanba menus orsamentu, maibé planu ne’e sei akontese tinan oin.
“Sira (mídia nain sira) mai atualiza sira nia situasaun internál, liga ho finanseira no rekursu umanu, liuliu kondisaun jornalista no proposta balun ne’ebé sira hatama mai SEKOMS atu hetan apoiu”, katak Sekretariu Estadu Komunikasaun Sosiál (SEKOMS), Mericio Juvenal dos Reis Akara, hafoin enkontru ho dirijente mídia nasionál sira iha salaun sorumutu SEKOMS Palásiu Governu, ohin.
Governu rekuñese falta finanseira no rekursu umanu iha mídia nasionál sira bazea ba proposta ne’ebé simu ona iha tinan ne’e.
Iha proposta ne’e mídia nain sira husu apoiu finanseira porvolta milliaun dolar ida resin, nomós reativa polítika distribuisaun jornál ba munisipíu, formasaun ba jornalista, ekipamentu, publikasaun publisidade, mantein kliente no seluk tan.
Mesmu adia, maibé governu tau ona iha polítika orsamentu 2019 sei apoiu mídia nasionál tantu públiku (RTTL,ep, Ajénsia TATOLI no radio komunidade) maibé sei apoiu mós mídia imprime sira hotu hanesan; Timor Post, STL, Jornal Independente, GMN no seluk tan.
“Iha tinan ne’e ita la konsege tanba osan ita uza selu divida no atividade seluk, tanba ne’e ekipa SEKOMS sei verifika nesesidade sira ne’ebé jornál sira presiza”, tenik.
Hosi Orsamentu Jerál Estadu (OJE) 2019 sei foti hosi tranferénsia públika hodi apoiu mídia nasionál maibe seidauk define montante tanba ekipa teknika sei verifika proposta hosi mídia nain sira.
Governante hateten sei la halo intervensaun ba servisu mídia nasionál sira intermus públikasaun notísia maske kontinua hetan apoiu hosi Governu.
Jornalista: Agapito dos Santos
Editora: Rita Almeida
