Top

Telkomcel Sei Halo Programa Umanitáriu Iha Loron Boot

Telkomcel Sei Halo Programa Umanitáriu Iha Loron Boot

DILI, (TATOLI) – Diretór Ezekutivu operadór telekomunikasaun Telkomcel, Yogi R. Bahar, hateten atu dezenvolve Kooperasaun ba responsabilidade sosiál, Telkomcel sei hala’o pakote fahe ai-han báziku ba komunidade iha momentu loron boot natál no tinan foun.

“Telkomcel la’ós halo negósiu de’it maibé fahe mós ai-han ba komunidade nu’udar sinál domin ho dame ba ita hotu iha loron natál no tinan foun”, Yogi Bahar ba jornalista sira liuhosi konferénsia imprensa iha nia edifísiu Fatuhada, ohin.

Tanba ne’e Telkomcel ajuda ai-han ba família uma kain 10 iha Baguia (postu administrativu ida iha Baukau), ajuda ai-han ba disabilidade iha instituisaun Fuan Nabilan, ajuda ai-han ba família uma kain 15 iha Irabere (Vikeke).

Nune’e mós Telkomcel loke klínika hodi ajuda populasaun iha Hera liuhosi prátika saúde gratuita no fó ekipamentu saúde nian. Telkomcel mós apoiu ai-han ba Fundasaun Quesadhib Ruak iha fatin haat mak Aileu, Ermera, Likisa no Dili.

“Ida ne’e parte ita fó parabens ba loron natál ne’ebé lori dame mai ita. Ha’u fiar katak kuandu ita fó buat ruma ba ema barak maka ita sei simu buat barak iha futuru”, dehan.

Nune’e mós Telkomcel durante ne’e la’ós foku ba negósiu de’it maibé investe mós ba área edukasaun lihosi oferesimentu bolsu estudu ba timoroan sira ba eskola iha Indonézia hamutuk nain 10, hosi hirak ne’e fila mai ona no Telkomcel halo ona rekrutamentu ba sira, no dadaun sira sai funsionáriu iha Telkomcel.

Enkuantu bolseiru nain lima ba masteradu iha Indonézia iha área manajementu nian mak sei la’o hela, tanba kuandu sira fila mai tenke halo jestaun ba Telkomcel iha futuru.

Jornalista: Zezito Silva

Editora: Rita Almeida

Publisidade

Leave a Reply

Latest Post

error: Content is protected !!