Estratéjia Kontra Korrupsaun, Governu Sei Servisu Hamutuk Ho KAK
DILI (TATOLI)—Ministériu Reforma Lejizlativa no Asuntu Parlamentár (MRLAP),Fidelis Leite Magalhães fó parabéns ba Komisáriu Komisaun Anti Korrupsaun (KAK) eleitu, Sergio Hornay, no lori oitavu governu nia naran, promete sei servisu hamutuk atu haree oinsá define estratéjia luta kontra korrupsaun.
“Ami sei hasoru malu ho Komisáriu KAK iha tempu badak hafoin halo pose atu. Molok fó pose, iha Fevereiru nia laran governu sei halo diskusaun atu halo estratéjia nasionál ida hodi luta kontra korrupsaun,” Fidelis Leite Magalhães informa hafoin reuniaun Konsellu Ministru, ohin iha Palasiu Governu.
Asunto ne’ebé sei sai diskusaun entre governu ho KAK hafoin komisáriu KAK pose mak hanesan; estratéjia nasionál kontra korrupsaun mak oinsá? avansa ho prevensaun ka ita atu avansa ho konsensializasaun edukasaun públika mak sai prioridade? Ho estratéjia hirak ne’e estabelsidu ho parseiru sira, hafoin haree nia ezekusaun ne’e halo oinsá?, mensajen atu fó sai ne’e oinsá?.
Nia fó hanoin katak “Durante ne’e eleisaun ba kandidatu Komisáriu KAK mak difisil maibé ikus mai, horisehik parlamentu halo ona votasaun ba Komisáriu KAK.”
Enkuantu loron ba toma da pose nian, tuir Ministru Fidelis seidauk iha data fixu, maibé governu sei hasoru malu ho Komisáriu iha tempu badak hafoin halo pose.
Jornalista : Zezito Silva
Editór : Manuel Pinto
