Dalan Rua Réapresia OJE Kuandu Prezidente Repúblika Veta.
DILI (TATOLI)–Prezidente Parlamentu Nasionál, Arão Noé de Jesus, esplika Parlamentu Nasionál sei uza dalan rua atu réapresia diploma orsamentu jerál Estadu (OJE) 2019 kuandu Prezidente Repúblika veta.
Arão hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin hala’o enkontru ho Xefe Estadu, Francisco Guterres Lú Olo.
Nia esplika katak dalan ida maka sei uza Konstituisaun artigu 88 aliña 3 liga ba artigu 95 (bele konsulta Konstituisaun RDTL) hodi réapresia diploma refere.
Dalan seluk, tuir nia, hatama rekomendasaun sira hosi Prezidente Repúblika hodi aprezenta hikas hanesan matéria foun.
“Ha’u hanoin katak kona-ba reapresiasaun ne’e laiha problema. Ita hein to’ok desizaun Prezidente Repúblika hanesan ne’ebé,” Arão tenik, no subliña lakohi interefere desizaun Xefe Estadu tanba órgaun Estadu ida-idak iha nia kompeténsia rasik.
“Kona-ba veta ka promulga ne’e Prezidente Repúblika nia kompeténsia. Veta ka promulga ne’e hotu-hotu konstitusionál,” nia esplika.
Jornalista: Xisto Freitas
Editór : Manuel Pinto
