DILI (TATOLI)-Ministra Finansa en ezersísiu, Sara Lobo Brites, apela ba funsionáriu Autoridade Aduaneira (Alfándega) tenke serbisu ho integridade, profisionalizmu, dixiplina tanba Alfándega hanesan odamatan boot ba nasaun.
“Sasán ne’ebé tama nasaun liuhusi Alfándega, funsionáriu Alfándega sira presiza iha integridade aas no serbisu hanesan ema profisionál”, Sara afirma ohin iha ámbitu selebrasaun loron mundiál Alfándega ba da-67 no aniversáriu Alfándega Timor-Leste dala-19 iha Ai tarak-Laran.
Vise-Ministra husu atu hatudu dezempeñu liuhusi defende valór hodi implementa prátika di’ak internasionál ho dedikasaun, onestidade, responsabilidade, integridade no profisionalizmu hodi salva guarda interese Estadu nian.
Aleinde ne’e husu sobre serbisu Alfándega nian, Ministra Finansa en ezersísiu ne’e hatete iha progresu di’ak ne’ebé AA halo mak uza sistema antigu mak Asycuda++ ba sistema foun mak Asycuda World.
“Agora ita uza sistema foun ne’ebé mais eletróniku no bele halo online entaun ita-nia importadór sira bele uza sistema liuhusi komputadór sein tenke prezensa fizikamente iha Alfándega hafoin sira bele halo prosesu dezálfandegamentu, entaun prosesu ne’e redús tiha tempu”.
Diretór Jerál Autoridade Aduaneira (AA), José António Fátima Abílio, hatete susesu ne’ebé AA atinje mak kona-ba sistema nian, enkuadramentu legál, atendimentu nian no konformidade nian.
“Iha diresaun sira ne’e iha interligasaun ba malu uza sistema Asycuda World hanesan plataforma ida ne’ebé Governu liuhusi rezolusaun iha 2016 aprova tiha ona atu lori ba iha janela únika. Kuandu ita tama iha faze ida ne’e esforsu barak tenke halo ho nasaun sira seluk para informasaun ne’ebé ita hato’o ba sira no sira bele hatene rekizitu saida maka presiza sira bainhira halo importasaun ruma no ita mós buka hatene rekizitu saida mak sira-nia lei permite atu fó mai no ita buka armoniza para fasilita komérsiu”.
Iha parte seluk AA hasoru mós dezafiu maka tenke haree kona-ba atitude funsionáriu ida no funsionáriu hotu-hotu tenke serbisu ho profisionál no integridade.
Tanba ne’e maka iha selebrasaun ne’e AA konvida Komisaun Funsaun Públika hodi ko’alia liu sobre étika no integridade funsionalizmu públiku nomós Komisaun Anti Korrupsaun (KAK) kona-ba perspetiva KAK Sobre papél aduaneira nian.
“Haree kona-ba integridade ne’e oinsá? Será ke durante ne’e sira hala’o serbisu ho integridade ka la’e tanba públiku dala barak kestiona Alfándega halo korrupsaun, maibé ita presiza iha mós prova para justifika, hatene katak balun-balun bele envolve iha ne’ebá”, katak.
Iha selebrasaun ne’e AA lansa mós lema “Smart Borders for Seamless Trade, Travel, and Transport” ho objetivu atu fó hanoin liuliu ba autoridade administrasaun alfandegária iha nasaun hotu-hotu atubele komemora loron ne’e hodi haree asaun saida maka foti relasiona ho lema ne’ebé maka husi Organizaun Mundiál Alfándega hasai atubele kria ambiente ne’ebé favoravel liu nune’e pasajeiru ka komersiante sé de’it maka liu husi fronteira bele hetan tratamentu ida lalais no iha prosesu merkadoria sira ne’e labele atraza fali ba iha komérsiu.
“Alfándega hanesan odamatan nasaun nian, nia iha responsabilidade boot ida atu komunika ho entidade hotu tantu estranjeiru ho nasionál bainhira ultrapasa fronteira”.
Lema ida ne’e fó motivasaun ba Alfándega atu reflete fali saida mak durante ne’e halo para bele fasilita komérsiu liuhusi fronteira ne’e.
Iha okaziaun selebrasaun ne’e halo semináriu loron tomak ne’ebé maka husi AA aprezenta relatóriu ba implementa programa no rezultadu servisu ne’ebé durante ne’e halo no planu ne’ebé sei implementa iha 2019.
Jornalista : Maria Auxiliadora
Editór : Manuel Pinto
