PN Enkontru Ho Entidade Kompetente Kona-ba Situasaun Rai-Laran
DILI, (TATOLI) – Parlamentu Nasionál (PN) ohin iha sala plenária halo enkontru porta feixada (taka) ho orgaun kompetente sira hanesan Ministériu Interior, Sekretaria Estadu Juventude no Desportu, Polísia Nasionál Timor-Leste (PNTL), F-FDTL no seluk tan, hodi atualiza situasaun rai laran ikus ne’e.
Prezidente Parlamentu Nasionál (PPN), Arão Noe, hateten enkontru ne’e bazea ba konsensu iha konferénsia lider bankada sira semana kotuk.
“Iha reuniaun lider bankada iha sesta, konsensu entre bankada sira atu enkontru ho Ministru Defeza no Seguransa hanesan Ministru interinu Interior ho Sekretáriu Estadu Juventude no Desportu hodi ko’alia situasaun rai laran ne’ebé akontese joven sira tuda malu, hana malu, oho malu no seluk tan ligadu ho situasau seguransa”, tenik ba jornalista sira ohin, iha resintu uma fukun.
Nia dehan situasaun atuál halo PN preukupa, tanba ne’e konvida ministériu kompetente sira atu bele esplika situasaun loloos ba deputadu sira, nune’e bele hetan esplikasaun klaru.
“Atu informa tanba saida mak akontesimentu ne’e, tanba sa mak situasaun ne’e iha no oinsá forsa seguransa rua PNTL no F-FDTL nia kolaborasaun hamutuk, nune’e bele prevene atividade kriminál sira atu labele disestabiliza situasaun rai laran”, katak.
PPN mós dehan enkontru ne’ebé la loke ba públiku tanba lakohi debate ne’e kria instabilidade.
“Enkontru ne’e taka ba públiku, tanba bainhira liga ba seguransa ita tenke ko’alia taka ba públiku tanba ita ko’alia kona-ba interesse nasionál, se la’e pergunta sira ne’ebé mak sai bele provoka situasaun”, dehan tan.
Hodi dehan tan enkontru ne’e hodi kruza infrmasaun entre deputadu sira no ministériu kompetente sira para bele foti asaun ruma.
Biban ne’e, PPN mós konfirma laiha rezolusaun ruma iha enkontru ne’e relasiona ho kestaun seguransa, maibé atu fahe de’it informasaun entre deputadu no ministériu kompotente sira.
Parte seluk Prezidente Komisaun B ne’ebé trata assuntu Defeza no Seguransa, Adérito Hugo, hateten debate urjénsia ho karater portaun feixada ne’e para atu halo diskusaun kle’an liu entre PN no entidade responsável sira.
Jornalista: Julia Chatarina
Editora: Rita Almeida
