DILI, (TATOLI) – Estudante finalista hamutuk ema nain neen hosi Administrasaun Públika, Universidade Nasionál Timor Lorosa’e (UNTL), ohin termina sira nia estájiu iha Sekretáriu Estadu Komunikasaun Sosiál, (SEKOMS) depois hala’o estájiu durante fulan rua.
Iha seremonia despedida, reprezentante estudante, Manuel Pinto, hatete estudu dirijidu iha SEKOMS ne’e hodi implementa kapasidade ida balansu entre teoria ho prátika.
Tanba ne’e agradese ba Sekretáriu ho funsionáriu tomak ne’ebé fó apoiu ba estudante sira durante sira nia estájiu hodi koñese entre realidade no teoria.
“Ami hein katak depois ami nia estudu dirijidu ne’e kolega balun iha sei iha teze foti tittlu hosi saida maka hetan iha estudu dirijidu ne’e rasik, iha loron ruma sira sei mai loke odamatan ba sira, para kontinua sira nia peskiza hodi finaliza sira nia nia teze”, dehan nia durante seremonia despedida iha Palasiu Governu, ohin.
Dosente orientadór, Júlio da Costa, agradese ba kontribuisaun no kolaborasaun hodi fó espasu ba estudante sira hodi implementa sira nia prátika durante estájiu.
Nia husu nafatin kooperasaun ne’e iha atu kontinua ba oin bainhira koloka estudante sira atu halo estájiu.
Sekretáriu Estadu Komunikasaun Sosiál, Mericio Juvenal dos Reis Akara, husu ba estudante finalista sira atu esforsu maka’as hodi finaliza teze atu bele hetan graduasaun.
“Importante ba ita boot sira atu finaliza prosesu halo skripsi tuir date-line no labele dada tempu naruk liu no tinan tenke remata, tanba balun sai mahasiswa abadi hodi la sai sarjana”, dehan Governante ne’e.
Jornalista: Agapito dos Santos
Editora: Rita Almeida
