MS Sei Estuda Pedidu Sosa Aimoruk Hosi Kuba

DILI, (TATOLI) – Governu liuhosi Ministériu Saúde (MS) sei halo estudu profunda kona-ba pedidu embaixadór Timor-Leste iha Kuba, Loro Horta, atu governu bele sosa aimoruk hosi nasaun Kuba, tanba folin baratu no kualidade.

Ministra Saúde en ezersísiu, Élia António de Araújo dos Reis Amaral, hatete governu konsidera pedidu ne’e, maibé presiza halo estudu ida iha nasaun ne’e hodi haree posibilidade ka la’e atu sosa.

“Ami sei ba fatin refere hodi haree kualidade aimoruk atu asegura iha nia pasiente no komunidade”, dehan Governante ba jornalista sira iha Palásiu Governu, ohin.

Durante ne’e, Ministériu Saúde liuhosi Servisu Autonómu Medikamentu no Ekipamentu Saúde (SAMES) sosa aimoruk hosi Indonésia, Malázia, Índia.

Entretantu diplomata timoroan, Loro Horta, hato’o ona pedidu ne’e ba Primeiru-Ministru, Taur Matan Ruak, tersa ne’e iha Palásiu Governu.

Jornalista: Agapito dos Santos

Editora: Rita Almeida