DÍLI, (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, ohin, iha Palásiu Governu, halo enkontru ho funsionáriu sira husi diresaun oion, asesór tékniku, jurídiku no seluk tan, hodi introduz diretór foun sira no koordena serbisu atu bele ezekuta planu no prioridade ne’ebé mak iha ho efisiénsia no efikasia.
Diretór foun sira mak aprezenta husi SEKOMS hanesan diretór ba Diresaun Nasionál Diseminasaun Informasaun (DNDI), Diretór ba Administrasaun no Finansa, Diretór ba Aprovizionamentu nomós Diretór ba Sentru Rádiu Komunidade, ne’ebé tutela ba Ministériu Reforma Lejislativa no Asuntu Parlamentar (MRLAP) ho SEKOMS.
“Enkontru halo koordenasaun, halo orientasaun jerál ba hothotu para hothotu sente katak informadu, hothotu sente akompaña prosesu, hothotu sente katak diretór foun, sira sei halo serbisu ba oin; ida ne’ebé mak la’o di’ak manten, saida mak presiza hadi’a, sira hadi’a”, informa Sekretáriu Estadu Merício Juvinal dos Reis “Akara” ba Ajénsia TATOLI iha marjen enkontru ne’e.
Governante ne’e mós afirma perante públiku katak planu no programa ne’ebé define ona, implementa ho di’ak no halo avaliasaun bebeik. Katak, ida ne’ebé mak di’ak kontinua hadi’a di’ak liután ho hanoin ne’ebé pozitivu no inovativu, no tenke nafatin bazea ba lei no regulamentu sira.
Nia mós husu entidade hotu ne’ebé tutela iha MRLAP ho SEKOMS atu bele serbisu hamutuk ho di’ak hodi apoiu mídia estatál, Rádiu no Televizaun (RTTL-EP) no Ajénsia Notísia ofisiál estadu Timor-Leste, TATOLI.IP
“La haluha mós ohin ha’u dehan para SEKOMS ne’ebé mak hamutuk ho MRLAP nafatin mós tau-matan ba RTTL ho Ajénsia TATOLI ne’ebé mak tutela, ita apoiu sira nafatin para dezenvolve án di’ak liu”, hateten Sekretariu Estadu Merício “Akara”.
Kona-ba kargu xefia balun ne’ebé mai husi funsionáriu iha instituisaun ka ministériu seluk, Sekretáriu Estadu, Merício Juvinal dos Reis “Akara” hateten, funsionáriu públiku ne’e nia bele halo kna’ar iha ne’ebé de’it bainhira presiza.
“Ita hanoin katak kargu xefia sira, diretór nasionál sira, ida ne’e oportunidade mós ba funsionáriu sira atu asume responsabilidade i sira-nia kapasidade, sira-nia poténsia, matenek no esperiénsia sira ne’ebé mak iha, sira bele kontribui”, hateten Sekretáriu Estadu.
Nia konsidera katak funsionáriu ka xefia sira bainhira kontribui iha fatin foun ne’ebé la hanesan ho fatin anteriór ka tuan dalaruma bele aplika di’ak liután iha fatin foun tanba ambiente foun, situasaun foun. Nune’e mós iha fatin tuan, dalaruma sira iha hanoin no vizaun no hanoin ne’ebé inovativu maibé la konsege implementa tanba oportunidade no ambiente diferente tanba ho ambiente foun bele kontribui no iha inovasaun.
“Se ita iha diretór foun mak husi ambiente seluk depois mak nia mai, dalaruma nia bele iha inovasaun foun, ambiente foun bele liga ho sira-nia funsionáriu sira bele serbisu hamutuk hodi dezenvolve án. Ne’ebé, la iha razaun espesiál ka espesífiku ruma, iha de’it mak kapasidade ne’ebé mak sira iha, ita aproveita atu desenvolve”, Merício “Akara” hatutan.
Iha fatin hanesan, Diretór Nasionál Diseminasaun Informasaun (DNDI), Estevão Belo informa katak durante nia mandatu sei ezekuta planu no programa ne’ebé governu programadu no planeadu tiha ona.
“Tinan ida ne’e ami sei hala’o programa prioridade sira ne’ebé mak atu ezekuta tuir padraun ne’ebé mak iha. Purezemplu hanesan diseminasaun informasaun ba povu sira ne’ebé mak iha área sira ne’ebé rurál. Ida ne’e mak prioridade”, hateten diretor DNDI foun.
Diretór ne’e mós kompromete, sei dezenvolve ba instituisaun sira atu bele garante kualidade komunikasaun iha meius komunikasaun no iha rede sosiál hodi bele promove liután étika komunikasaun, liliu aktu sira ne’ebé hamosu insulta ba lider sira no seluk tan. “Ida ne’e mak ami-nia prioridade atu kontrola sistema ida ne’e”, tenik Diretór Estevão Belo hodi garante katak sei serbisu hamutuk ho entidade hotu.
Iha sorumutu ho funsionáriu no komponente sira ne’ebé tutela ba MRLAP no SEKOMS, sekretáriu estadu mós rekoñese no apresia dezempeñu serbisu diretór sesante sira.
“Ho enkontru ida ne’e ita aproveita fó apresiasaun ba ita-nia diretór sesante sira tanba durante ne’e halo serbisu, halo sira-nia kna’ar ho di’ak, liliu Diretór Nasionál Diseminasaun sesante, Orlando da Conceição ho Diretór Nasionál Sentru Rádiu Komunidade sesante, Luís Evaristo Soares”, hateten Sekretáriu Estadu, Merício “Akara”.
Jornalista: Rafy Belo
Editór: Francisco Simões
