DILI, (TATOLI) – Komandante Operasaun Nasionál, Superintendente Xefe Pedro Belo, hatete prosesu investigasaun maka sei justifika kauza hosi atuasaun polísia munisípiu Dili hasoru manifestante negosiante ambulante hodi rezulta vítima na’in rua kanek.
“Atu hatene kauza loloos maka tenke liuhosi investigasaun foin hatene, tanba ita labele dehan polísia tiru gas maka kona, halai monu mak kanek ka ou ema ruma maka halo kanek, tanba ne’e liuhosi investigasaun maka hatene”, Pedro Belo ba jornalista sira iha Kuartél Jerál Kaikoli, ohin.
Nia afirma prosesu investigasaun oras ne’e la’o hela, tanba ne’e públiku tau nafatin konfiansa ba Polísia Nasionál Timor-Leste (PNTL) atu hetan lia-loos hosi akontesimentu ne’e.
Eis Komandante PNTL Munisípiu Dili rekoñese rejime jurídiku instituisaun númeru 43/2011 bandu polísia uza kilat hodi tiru diretamente ba manifestante sira maibé iha lei ne’e fó dalan atu tiru gas hodi halo kalma situasaun.
“Iha meiu seluk bele uza maibé ita hatene parlamentu orgaun soberanu ida lei bandu ita labele halo demo iha ne’ebá”, tenik tan.
Pedro Belo hatutan atuasaun horiseik membru sira hala’o sira nia kna’ar bazeia ba lei manifestasaun númeru 1/2016 artigu 10 hatete se de’it maka atu halo manifestasaun ka atividade iha fatin públiku tenke hatama karta koñesimentu ba autoridade sivíl no seguransa loron haat antes.
Maibé ba kazu negosiante horiseik, Pedro Belo haktuir nia parte foin simu karta iha loron 1 fulan abril ho fatin atividade iha Largo Lesidere la’ós iha área parlamentu.
Nia reforsa lei manifestasaun artigu 5 hatete manifestante sira labele halo asaun protesta iha fatin públiku sira hanesan Parlamentu Nasionál, Palásiu Governu, Palásiu Prezidensiál, Portu, Aeroportu no seluk tan ho distánsia tenke do’ok hosi metru 100.
Ho violasaun hosi manifestante maka polísia kumpre devér tuir artigu 7 lei manifestasaun hodi halo intervensaun no atuasaun bainhira polísia la kumpre maka orgaun soberanu no se de’it sei halo keixa hasoru polísia tanba la kumpre devér.
“Polísia ninia atuasaun horiseik ne’e tuir lei númeru 1/2016 artigu 7 tanba sira kontra ona artigu 5”, afirma.
Hosi atuasaun ne’e, komandu munisípiu Dili konsege detein manifestante na’in rua iha sela polísia hodi tuir interrogatóriu dahuluk iha tribunál.
Jornalista: Agapito dos Santos
Editora: Rita Almeida
