DÍLI, 02 maiu 2019 (TATOLI)-Primeiru-Ministru, Taur Matan Ruak, afirma, fó ona orientasaun ba Ministériu Finansa atu hahú halo avaliasaun ida kona-ba kustu moris sidadaun sira hodi hadi’a polítika governu ba implementasaun saláriu mínimu iha Timor Leste.
“Ita atu aumenta osan, se atu aumenta ne’e hosi saláriu mínimu ka aumenta saláriu ida hosi kakuluk ne’e ka ida ne’e ita tenke hatene kustu da vida”, hateten Primeiru-Ministru Taur Matan Ruak, ohin, hodi responde Jornalista sira kona-ba polítika Governu atu hadi’a lei ba implementasaun saláriu mínimu iha Palásiu Prezidensiál Bairru-Pité, Dili.
Taur Matan Ruak hatutan, hosi rezultadu avaliasaun maka sei apoiu governu atu foti desizaun polítika ba definisaun salariál ba funsionáriu públiku ne’ebé servisu iha instituisaun estadu no sidadaun ne’ebé servisu iha kompañia privada sira.
“Tempu oin mai ami bele iha tan dadus sira ne’e para bele ajuda ita define ita nia polítika ba progresu salariál ba ita nia sidadaun hanesan traballadór no funsionáriu sira”, hateten Taur Matan Ruak.
Oras ne’e governu implementa hela saláriu mínimu ho valor US$115/fulan tuir lei mak vigor hela. .
Jornalista: Agapito dos Santos
Editór: Francisco Simões
