iklan

NASIONÁL, DILI, POLÍTIKA

Timor-Leste Presiza Tau Atensaun ba Ajenda Importante ONU Nian

Timor-Leste Presiza Tau Atensaun ba Ajenda Importante ONU Nian

Prezidente Repúblika Francisco Guterres Lú Olo, Sesta (3/5/2019), iha Palásiu Prezidente Nicolau Lobato, Bairru-Pite, Dili, halo enkontru ho Embaixadóra Timor-Leste iha Nasoins Unidas (ONU), Milena Pires. Imajen/Media PR

DÍLI, 3 maiu 2019 (TATOLI)-Timor-Leste presiza tau atensaun ba ajenda importante Organizasaun Nasoins Unidas (ONU) nian iha 2019.

Tuir ajenda, iha Jullu, tinan ne’e, Timor-Leste sei aprezenta relatóriu kona-ba 2030. Iha fulan Setembru, iha Asembleia Jerál Nasoins Unidas sei hala’o simeira kona-ba mudansa klimátika, avaliasaun globál mundu tomak kona-ba planu 2030 kona-ba dezenvolvimentu sustentavel no sei iha simeira kona-ba saúde, dezarmamentu no ikus liu simeira kona-ba situasaun illa sira nian. Iha Novembru, sei organiza forum kona-ba implementasaun meta númeru 16 ne’ebé ko’alia kona-ba sosiedade pasifika, inkluziva no justa iha Dili. 

Liuhosi sorumutuk ho Prezidente Repúblika  Francisco Guterres Lú Olo iha Palásiu Prezidente Nicolau Lobato, Bairru-Pite, Dili, ohin, Embaixadóra Timor-Leste iha Nasoins Unidas (ONU), Milena Pires, relata atividade misaun Timor-Leste iha Nova Iorke.

Komunikadu imprensa hosi Gabinete Media Prezidente Repúblika   relata katak, liuhosi enkontru entre Prezidente Repúblika, Francisco Guterres Lú Olo ho Embaixadóra Milena Pires, informa apoiu estadu Timor-Leste dezde uluk ba direitu autodeterminasaun povu Sarawi no akompañamentu ba situasaun Guine-Bissau. 

Progresu misaun Timor-Leste iha Nasoins Unidas pozitivu tebes. Nasaun membru ONU haree Timor-Leste hanesan istória susesu, tanba Timor-Leste konsege hetan restaurasaun, administrasaun Nasoins Unidas iha períodu tranzisaun.

Timor-Leste mós hetan rekoñesimentu boot kona-ba doasaun ajenda 2030 no hetan rekoñesimentu nu’udar país solidáriu ba nasaun seluk.

“Kestaun sira ne’e hotu, halo nasaun membru Nasoins Unidas nia rekoñesimentu haree pozitivu tebes”, informa  Milena Pires.

Prezidente Repúblika enkoraja no rekomenda nafatin Embaixadóra, Milena Pires, atu kontinua servisu ba interese estadu Timor-Leste tuir kna’ar iha Nasoins Unidas.

Dezde 2016, Estadu hili Milena Pires nu’udar Embaixadóra Timor-Leste iha ONU hodi halo misaun diplomata no defende nasaun nia interese. 

Edisaun: Francisco Simões

iklan
iklan

Leave a Reply

iklan
error: Content is protected !!