DILI, 05 maiu 2019 (TATOLI) – Diretora Saúde Munisípiu Dili, Agostinha Segurado, hatete númeru moras lepra aas iha kapitál depois Rejiaun Administrativa Espesiál Oekusi-Ambenu (RAEOA), tanba ne’e saúde munisípiu Dili nafatin halo sensibilizasaun ba komunidade atu kuidadu ijiene nune’e redús moras ne’e.
“Ami mós iha ona kapasitasaun ba médiku sira iha postu saúde no sentru saúde sira atu bele haforsa sira nia koñesimentu hodi deteta ema ne’ebé sofre moras lepra”, hateten nia ba TATOLI iha sentru Saúde Vera Krús, sábadu, (5/5).
Nia afirma Dili nu’udar munisípiu daruak rejista númeru moras lepra sa’e maka’as iha tinan 2018, depois RAEOA.
Atu kombate moras refere, Segurado haktuir ninia parte nafatin halo intervensaun no prevensaun liu husi sensibilizasaun ba komunidade hodi tratamentu kle’an liu hodi deteta ema hotu-hotu ne’ebé ho sintoma lepra nian presiza iha intervensaun lalais husi saúde munisípiu Dili.
Nia afirma moras lepra ne’e hanesan moras ida ne’ebé abandonadu. Katak saúde munisípiu prioridade liu ba moras kontajioza, maibé moras lepra kategoria moras la kontajioza.
“Durante ne’e ita haree moras lepra ne’e bai-bain ema bolu katak moras ne’e mai husi jerasaun, maibé ba ami haree moras ne’e mai husi ijiene no hahalok komunidade nian ne’ebé dala barak haree ita husik de’it, tanba ita haree hanesan katar ida, kuandu ita husik de’it maka bele hamosu moras lepra”, esplika.
Saúde Munisípiu Dili haree porsentu moras lepra ki’ik, maibé rasionaliza ba númeru tinan 2018 iha kazu hamutuk 47 maibé iha 2019 saúde munisípiu Dili rasik seidauk iha númeru serteza.
Maibé lideransa másimu espera ho sensibilizasaun ne’ebé hala’o ona bele redús númeru ne’ebé iha.
Saúde Munisípiu Dili enkoraja komunidade atu hakbesik aan ba sentru saúde hodi hetan tratamentu bainhira hetan sintoma ruma ba moras lepra.
Jornalista: António Gusmão
Editora: Rita Almeida
