Komisáriu Faustino Husu Joven Uza Internet ho Moral

DILI,16 maiu 2019 (TATOLI)-Komandante Polísia Nasionál Timor-Leste, Komisáriu, Faustino da Costa, husu ba joven sira atu utiliza internet ho responsabilidade moral liuliu prevene pornografia hodi prevene abortus no soe bebé.
“Kazu ida soe bebé ne’e ha’u hakarak atu dehan ita uza meius ruma mais modernu maibé la tuir nia dalan hanesan media sosiál, ema balun interpreta meius ida negativu no tenta para atu pratika nia rezulta maka abortu no soe bebé”, hateten Komisáriu Faustino da Costa, ba Jornalista sira hafoin informa kazu soe bebé ida iha Hera, semana kotuk, ba Prezidente Repúblika, Francisco Guterres Lú Olo, ohin, iha Palásiu Prezidensiál, Bairru-Pité, Dili.
“Kona-ba suspeita soe bebé ne’e polisia identifika ona atu tempu besik sei halo detensaun”.
Nia dehan, prezensa mundu teknolojia agora importante atu apoiu ema ida-idak hodi estuda no aprende siénsia foun, la’ós atu uza ba dalan negativu hanesan pornografia no seluk tan.
Tuir ninia observasaun iha rede sosiál oras ne’e ema barak uza hodi halo difamasaun hasoru ema seluk tan.
Jornalista : Agapito dos Santos
Editór : Francisco Simões

