DILI, 17 maiu 2019 (TATOLI)—Governu liuhusi Ministériu Ensiñu Superiór, Siénsia no Kultura (MESSK), oras ne’e tama ona iha faze termu referénsia hodi buka péritu balun halo estudu viabilidade ba sidade universidade iha Munisípiu Aileu.
Razaun governu hakarak harii sidade universidade iha Aileu atu evita estudante konsentra iha kapitál Dili.
“Agora dadaun iha faze termu referénsia. Kuandu ami finaliza termu referénsia ne’e, ami sei publika sai para bele iha kompetisaun atu hala’o estudu viabilidade,” Ministru Ensiñu Superiór, Siénsia no Kultura, Longuinhos dos Santos, ko’alia ba jornalista sira iha Palásiu Governu, sesta (17/5/2019).
Governante ne’e hateten, bainhira sidade universidade Aileu ne’e harii ona sei involve veteranu sira-nia oan no povu baibain sira-nia oan eskola iha ne’ebá. Nune’e mós, sei involve universidade privadu iha sidade universitáriu ne’e, tanba prosesu atu lori kursu saida, sei fó sai ba públiku iha prosesu tuir mai.
“Péritu ita seidauk hatene, tanba foin mak termu referénsia . Ita publika sai sira foin kompete,” tenik governante ne’e.
Iha fatin hanesan, Reitór UNPAZ, Lucas da Costa, husu governu atu loke diskusaun kle’an molok harii sidade universidade ne’e, nune’e programa ne’e labele falla.
Nune’e mós, Reitór Dili Institute of Tehcnology (DIT), Álvaro Amaral, hatete governu presiza hanoin didi’ak molok loke sidade universidade ne’e.
Tuir nia, sé ida ne’e mak harii duni bele halo universidade privadu sira bele taka, tanba UNTL de’it mós estudante barak satán loke tan sidade universidade ne’e, ema sei la ba eskola iha universidade privadu sira.
Hatán ba preokupasaun ne’e, Ministru Longuinhos dehan, governu sei haree hodi involve mós universidade privadu iha iha universidade refere.
“Prosesu diskusaun ba ida ne’e sei kontinua, tanba preokupasaun sira ne’e mak VIII Governu estabelese Ministériu Ensiñu Superiór, Siénsia no Kultura hodi foka liu-ba problema sira ne’e,” nia informa.
Jornalista: Evaristo Soares Martins
Editór: Xisto Freitas
