KM Atribui Plenu Podér Ba SEAK Asina MoU ho Institutu Hosi Fransa
DILI, 22 maiu 2109 (TATOLI)—Desizaun Konsellu Ministru (KM), atribui plenu podér ba Sekretáriu Estadu Arte no Kultura (SEAK), Teófilo Caldas, hodi asina nota entendementu (MoU-sigla inglés) ho Insitutu Peskiza ba Dezenvolvimentu Sustentável hosi nasaun Fransa.
Konsellu Ministru análiza proposta memorandu entendementu refere no halo ona aprovasaun, ne’ebé aprezenta hosi Ministru Ensinu Superiór, Siénsia no Kultura, Longuinhos dos Santos, kuarta (22/5/2019), ho objetivu atu halo peskiza sientífika no téknika kona-ba Timor-Leste nia patrimóniu kulturál.
“Sekretaria Estadu Arte no Kultura, bele asina ona ho organizasaun Franseza ida naran Institutu Peskiza ba Dezenvolvimentu Sustentável,” Ministru Estadu Prezidénsia Konsellu Ministru, Hermenegildo Augusto Cabral Pereira, informa iha Palásiu Governu, kuarta ne’e.
Iha fatin hanesan, Sekretáriu Estadu Arte no Kultura, Teófilo Caldas, informa Konsellu Ministru halo ona aprovasaun ba proposta ne’e.
“Ohin partisipa iha Konsellu Ministru, hetan tiha aprovasaun ona, agora tama ba implementasaun. Sekretaria Estadu Arte no Kultura agradese ba membru governu hotu-hotu inklui prmeiru-ministru, tanba fó tiha ona apresisaun no aprova tiha ona nota entendementu ne’e. Ita hahú tama ba implementasaun ho institutu ida hosi Fransa ne’e,” nia dehan ba Agência TATOLI.
Jornalista: Evaristo Soares Martins
Editór: Xisto Freitas
