DILI, 28 maiu 2019 (TATOLI)—Governu liuhusi Ministériu Interiór sei harii tan uma 40 ba Ofisiál Polísia Suku (OPS) iha territóriu Timor-Leste.
Diretora Jerál Serbisu Korporativu Ministériu Interiór, Guilhermina F.S. Ribeiro dehan, agora dadaun Ministru Interiór Interinu, Filomeno da Paixão de Jesus, fó ona orientasaun hodi halo koordenasaun ho Komandu PNTL para aprezenta proposta hodi governu prevee iha orsamentu jerál Estadu (OJE) 2020-2023 nian.
Nia dehan, iha planu Ministru Interiór nian ba oin mak sei fó atensaun másimu ba serbisu OPS inklui Diresaun Nasionál Seguransa Rodoviária (DNSR) no Diresaun Jerál Serbisu Migrasaun (DJSM).
Atu fó apoiu ba serbisu hirak ne’e, Ministru Filomeno hala’o ona enkontru ho ekipa sira hodi prevee mós orsamentu hodi kontinua koopera ho parseiru dezenvolvimentu sira hanesan Nova Zelándia no Fundasaun Ázia.
Nia hatutan, Governu Noza Zelándia rasik harii tiha ona uma 14 ba OPS, tanba ne’e governu hakarak investe tan osan hadi’a di’ak liu-tan fasilidade serbisu ba membru OPS sira.
“Tuir orientasaun planu hosi ministru ne’e hakarak harii postu 40 ba Ofisiál Polísia Suku (OPS) no planu ne’e mós sei haree ba prioridade ne’ebé PNTL sei aprezenta hodi governu avalia,” nia hateten ba Agência Tatoli iha Kuartel Jerál PNTL, Caicoli, Dili, ohin.
Guilhermina informa, governu sei sosa mós fasilidade hanesan transporte, farda, fasilidade rádiu komunikasaun no fasilidade seluk tan ne’ebé sei ajuda serbisu OPS no Diresaun Nasionál Seguransa Rodoviária (DNSR) nian.
Planu seluk, nia haklaken, mak governu hakarak aumenta rekursu membru OPS sira, tanba dadaun ne’e Komandu PNTL liuhusi Departamentu Polísiamentu Komunitária Nasionál (DPKN) hamutuk ho parseiru estabelese ona estrutura polísiamentu komunitária hanesan Konsellu Seguransa Munisípiu (KSM) iha munisípiu 12 no Konsellu Seguransa Rejionál (KSR) iha Oé-Cusse no estabelese ona Konsellu Polísiamentu Komunitária (KPK) iha nível suku 246 hosi munisípiu 11 no Rejiaun Oé-Cusse no falta Munisípiu Lautém mak seidauk iha KPK.
Kona-ba rekurtamentu ba membru PNTL foun, nia tenik, tuir planu sei hala’o iha tinan 2020 hodi aumenta númeru polísia atu lori polísia hakbesik liu-tan povu para hamutuk kria pás hodi lori Timor-Leste la’o to’o tinan 2030 ema hotu bele moris ho livre.
Jornalista: Eugénio Pereira
Editór: Xisto Freitas
