DILI, 28 maiu 2019 (TATOLI)–Governu Nova Zelándia kontinua koopera ho Komandu Polísia Nasionál Timor-Leste (PNTL) kontinua deskuti planu tranzisaun apoia kapasitasaun rekursu membru Ofisiál Polísia Suku (OPS).
Komandante Komandu Operasaun Nasionál (KKON), Pedro Belo dehan, hahú tinan ne’e ba oin, parseiru Noza Zelándia sei apoia kapasita rekursu membru OPS sira hotu hodi dezenvolve di’ak liu-tan serbisu OPS iha komunidade nia leet.
“Ami kontinua deskuti oinsá maka Noza Zelándia kontinua fó nafatin apoiu ba ita-nia OPS sira atu hasa’e sira nia rekursu umanu oinsá bele koopera di’ak liu-tan ho ita-nia povu rezolve problema sira ne’ebé mosu,” dehan Pedro Belo ba jornalista sira iha Kuartél Jerál PNTL, Caicoli, Dili, ohin.
Nia esplika, modelu formasaun ne’ebé sei oferese ba membru OPS no komandante sira maka atu muda mentalidade no karáter oknum polísia sira bele iha kapasidade atu koopera ho autoridade suku no joven sira rezolve problema ho maneira diálogu hodi fó solusaun ba pás iha suku idak-idak bainhira mosu kazu krime ruma.
Iha prosesu avaliasaun ne’e, Pedro hatutan, ekipa tékniku Nova Zelándia no Komandu PNTL deskuti mós dezafiu no progresu serbisu ne’ebé la’o ona no apoiu sira ne’ebé Nova Zelándia sei fó ba OPS durante fulan 18 nia laran.
Nia hatutan, liuhusi enkontru ne’e sira deskuti oinsá mak Nova Zelándia apoia orsamentu hodi junta ho programa no orsamentu Governu TL nia apoia ba OPS.
Iha fatin hanesan, Koordenadór Programa Dezenvolvimentu Nova Zelándia, Augusto Soares informa iha dezembru 2020, Noza Zelándia nia programa apoia OPS ramata ona. Agora falta fulan 18. Ne’e duni, Nova Zelándia iha kompromisu atu ajuda kapasita nafatin OPS ho apoiu fasilidade hanesan harii uma 14 ba OPS sira iha munisípiu 12 inklui Oé-Cusse.
“Ami koopera ho PNTL ba fulan 18 ne’e ita sei investe maka’as iha área prioridade sira ne’ebé la’o di’ak ona ita bele reforsa atu PNTL bele hetan sustentabilidade,” nia hateten.
Augusto haklaken katak Noza Zelándia mós prontu koopera ho Governu Timor-Leste karik hakarak halo reforma ba PNTL tenki hato’o kompletu konseitu reforma ida klaru. Konseitu reforma ne’e mós tenki mai ho ninia rekursu ne’ebé sufisiente atu halo reforma ba PNTL ho susesu.
Nia hateten, governu TL bele ko’alia polítika reforma maibé bainhira la aloka orsamentu mak reforma ne’e sei labele la’o di’ak tuir Governu nia hakarak (alvu).
“Se governu desidi reforma ho alvu ida klaru mak sei fó seguransa ida kualidae ba povu Timor-Leste,” tenik Augusto.
Durante tinan 10 nia laran, Governu Nova Zelándia akompaña dezafiu barak maka PNTL hasoru no presiza rezolve liuhusi rekursu finanseiru, rekursu umanu no presiza kooperasaun di’ak husi nível polítika no legál hodi reforma PNTL para labele mosu problema.
Jornalista: Eugénio Pereira
Editór: Xisto Freitas
