BALIBO, 7 maiu 2019 (TATOLI)—Governu liuhosi Sekretaria Estadu Komunikasaun Sosiál (SEKOMS), sei halo esforsu promove potensialidade kada suku iha territóriu nasionál.
“Ita-nia alvu durante tinan-lima hakarak no esforsu promove potensialidade kada suku, hanesan poténsia ekonómika, turístika no kulturál, nune’e ema iha estranjeiru bele hatene ita-nia poténsia sira ne’e,” Sekretáriu Estadu Komunikasaun Sosiál, Merício Akara, ko’alia asuntu ne’e iha edifísiu Postu Administrativu Balibo, Munisípiu Bobonaro, ohin.
Nia dehan, SEKOMS nia papél promove potensialidade hotu-hotu liuhosi komunikasaun no informasaun.
Governante ne’e akresenta, presiza iha interasaun entre ministériu relevante, nune’e lori informasaun hosi baze ba nasionál no informasaun sira ne’e governu presiza fó atensaun iha tinan lima nia laran.
“Tuir estudu katak populasaun ne’ebé asesu RTTL foin atinje %40, maibé %60% seidauk. Ne’e duni, governu sei monta tan torre 13 iha Timor laran tomak atu bele fasilita populasaun asesu informasaun,” Akara afirma.
Nia haktuir, oras ne’e iha ona programa governu ho naran programa ‘Naroman ba Suku’ ne’ebé ho intensaun atu promove poténsia kada suku nian.
Iha fatin hanesan, Prezidente Autoridade Munisípiu Bobonaro, Zeferino Soares dos Santos, orgullu ho polítika VIII Governu ne’ebé hakarak promove poténsia kada suku.
“Suku sira iha Bobonaro maioria iha potensialidade hanesan turizmu, agrikultura, turístika no kulturál,” Akara tenik.
Postu Administrativu Balibo iha suku 6 hanesan suku Balibo Vila, Batugade, Cowa, Leohitu, Leo Lima no Sanirin. Tuir demografia, Postu Balibo iha tinan 2017, totál populasaun hamutuk 18.274. Hosi númeru ne’e, iha mane na’in 9.292, feto na’in 8.972 no iha família 4.209. Postu Administrativu Balibo ho nia luan kilómetru 296.
Jornalista: Evaristo Soares Martins
Editór: Xisto Freitas
