DILI, 14 juñu 2019 (TATOLI)—Unidade Polísia Espesiál Seksaun Antí Terrorizmu (UPEAT), kaptura joven na’in rua ho inisiál AD no AS ne’ebé sikat sasán kro’at hanesan tudik no martelu iha estrada ibun Rotunda Prezidente Nocolau Lobato Comoro, Dili, iha kinta (13/03) kalan.
Tuir observasaun jornalista Agência Tatoli, joven na’in rua ne’e oras ne’e ho kondisaun detidu iha sela Polísia Munisípiu Dili hodi hein prosesu investigasaun kona-ba motivu lori sasán kro’at refere.
Joven rua ne’e polísia kaptura hafoin sira ba hemu tua iha Tasi-Tolu fila mai to’o iha área Rotunda Prezidente Nicolau Lobato ho kondisaun lanu no lori sasán kro’at ho motór tenta halai sees hosi membru polísia sira ne’ebé halo hela operasaun (razia) iha estrada laran.
Operasaun serbisu ne’ebé membru UPEAT halo ne’e hodi implementa despaisu Komandante Jerál Polísia Nasionál Timor-Leste (PNTL), Komisáriu Polísia Faustinho da Costa atu bele buka tuir autór sira ne’ebé taa kanek membru ajente polísia no joven sira iha kapitál Dili.
Antes ne’e, Komandante Jerál PNTL, Komisáriu Polísia Faustinho hasai ona órden serbisu hodi husu polísia halo operasaun buka tuir autór sira ne’ebé taa kanek joven ida iha área Kolmera, Dili, no membru ajente polísia ida iha área Rotunda Komoro, foin lalais ne’e.
Operasaun serbisu ne’e sei hala’o iha Dili inklui Munisípiu Baucau no Bobonaro ne’ebé sai risku ba problema organizasaun arte marsiál hodi hakalma situasaun konflitu entre joven sira ne’ebé kontinua provoka malu iha tempu kalan.
Komandu PNTL rasik rejista kazu durante fulan maiu to’o 13 juñu 2019 hamutuk 408 kompostu hosi asidente tráfegu, kazu krimi droga, konflitu tuda malu, sona ho hana malu entre organizasaun arte marsiál inklui kazu soe bebé iha Munisípiu Dili no Covalima.
Jornalista : Eugénio Pereira
Editór: Xisto Freitas
