DILI, 17 juñu 2019 (TATOLI)– Tuir rejimentu Parlamentu Nasionál (PN), sesaun plenária realiza iha loron segunda no tersa, maibé tanba deputadu barak mak la-marka prezensa, loron ohin laiha plenária hanesan baibain.
Vise-Xefe Bankada FRETILIN, Francisco Miranda Branco informa katak deputadu sira hetan konvite husi Autoridade Rejiaun Administrativa Espesiál Oe-cusse Ambeno (RAEOA) nia hodi partisipa iha seremónia aniversáriu RAEOA ba dalima no inagurasaun Aeroportu Internasionál Rota do Sândalo iha enklave Oe-Cusse, aban (18/06).
“Sira bazeia ba konvite ne’e no sira halo viajen, balun liuhosi komisaun hanesan reprezentante husi komisaun no balun husi bankada rasik,” hateten Vise-Xefe Bankada FRETILIN, Francisco Miranda Branco ba jornalista sira iha Parlamentu Nasionál (PN), segunda ne’e.
Entretantu, seremónia ne’e sei hetan partisipasaun másimu husi membru Governu, membru PN, korpu diplomátiku no parseiru dezenvolvimentu governu sira ne’ebé antes ne’e hetan konvite husi Autoridade RAEOA.
Jornalista : Julia Chatarina
Editór : Rafy Belo
